நடிகையர் திலகம் படத்துக்கு பிறகு நாக் அஸ்வின் இயக்கும் படத்தில் பிரபாஸ், கமல்ஹாசன், அமிதாப் பச்சன், திபீகா படுகோன் ஆகியோர் நடிப்பில் புராஜெக்ட் கே என்ற பெயரில் திரைப்படம் உருவாகிவருகிறது.
வைஜெயந்தி மூவிஸ் தயாரிக்கும் இந்தப் படத்துக்கு சந்தோஷ் நாராயணன் இசையமைக்கிறார்.
இந்தப் படத்தின் க்ளிம்பஸ் வீடியோ நேற்று அமெரிக்காவில் நடைபெறும் காமிக் கான் நிகழ்வில் வெளியிடப்பட்டது.
இந்தப் படத்துக்கு கல்கி 2898 ஏடி என்று பெயரிடப்பட்டுள்ளது. விஷ்ணுவின் கல்கி அவதாரமாக இந்தப் படத்தில் பிரபாஸ் நடிக்கிறாராம். மேலும் 2898ல் நடப்பது போல படமாக்கப்பட்டுவருவதாக கூறப்படுகிறது.
முதலில் இந்தப் படத்திலிருந்து பிரபாஸின் போஸ்டர் வெளியாகி ஃபேன் மேட் போஸ்டர் போல இருப்பதாக விமர்சனத்துக்குள்ளான நிலையில் இந்த கிளிம்ப்ஸ் வீடியோவில் கிராஃபிக்ஸ் காட்சிகள் நன்றாக இருப்பதாக ரசிகர்கள் கருத்து தெரிவித்துவருகின்றனர்.
கிளிம்ப்ஸ் வீடியோவில் நடிகர் பசுபதியும் இடம்பெற்றுள்ளார். மிகவும் எதிர்பார்க்கப்பட்ட நடிகர் கமல்ஹாசன் இந்த வீடியோவில் இடம்பெறவில்லை.
வில்லன் அந்த கடாயுதத்தை பறித்துக்கொண்டு அதன் சக்தியை தவறாக பயன்படுத்துவதும் அதனை மீட்பதுதான் இந்தப் படத்தின் கதை என்று கூறப்படுகிறது. இந்தப் படத்தில் வில்லனாக கமல் என கூறப்படுவது குறிப்பிடத்தக்கது.
