சத்யராஜ் மற்றும் அவருடைய மகன் சிபிராஜ் ஆகியோர் இணைந்து நடித்த ஜாக்சன் துரை திரைப்படம் 2016 ஆம் ஆண்டு வெளியானது. அந்த திரைப்படத்தை தரணிதரன் என்பவர் இயக்கியிருந்தார். ஜாக்சன் துரை திரைப்படம் ஹாரர் காமெடி வகையில் எடுக்கப்பட்டிருந்தது. அந்த திரைப்படம் ரசிகர்கள் மத்தியில் மிகப்பெரிய வரவேற்பு பெற்றது.
இதன் காரணமாக நல்ல வசூலையும் செய்தது. வசூல் ரீதியில் வெற்றியடைந்த அந்த திரைப்படத்தின் இரண்டாம் பாகத்தை தற்போது அதே இயக்குனர் தரணிதரன் இயக்கி வருகிறார். அந்த திரைப்படத்திலும் சிபிராஜ் மற்றும் சத்யராஜ் ஆகியோர் இணைந்து நடிக்கின்றனர். இதற்கான படப்பிடிப்பு இறுதி கட்டத்தை எட்டியுள்ளது.
இந்த நிலையில் படத்தின் முதல் பார்வையை படக்குழுவினர் வெளியிட்டுள்ளனர். அதில் சத்யராஜ், ஆங்கிலேயர்கள் உடையில் கோபத்துடன் இருப்பது போன்ற தோற்றம் இடம்பெற்றுள்ளது. இந்த இரண்டாம் பாகம் முதல் பாகத்தில் இருந்து முற்றிலும் வேறுபட்டதாக இருக்கும் என இயக்குனர் தெரிவித்திருக்கிறார்.
அது மட்டுமில்லாமல் இரண்டு வேறு காலகட்டங்களில் ஜாக்சன் துரை சாப்டர் 2 திரைப்படத்தின் கதை நடக்கும் எனவும் ஏற்கனவே கூறியிருந்தார். இதன் காரணமாக இருவருக்கும் இரண்டு வேறு வேறு தோற்றங்கள் இருக்கலாம் என்றும், இதில் வரும் ஹாரர் காமெடியும் ரசிகர்களை கவரும் என்றும் படக் குழுவினர் எதிர்பார்க்கின்றனர். ஜாக்சன் துரை படத்தில் பிந்துமாதவி நாயகியாக நடித்திருந்த நிலையில் இரண்டாம் பாகத்தில் சம்யுக்தா என்ற இளம் நடிகை நடித்துள்ளார்.
