“வன்முறைக்கு எதிராக – தற்காப்புக்காக திருப்பி அடிக்க முடியும். அரசாங்கமும் சட்டமும் எங்களுக்கு பாதுகாப்பு தராவிட்டால் எமது குடும்பத்தையும் சொத்தையும் பாதுகாக்க நாம் திருப்பி அடிக்க முடியும்”, என்று தமிழ் முற்போக்கு கூட்டணி தலைவர் மனோ கணேசன் தெரிவித்துள்ளார்.
‘மலையகம்-200’ நூல் வெளியீட்டு விழா நேற்று புதுக்குடியிருப்பில் நடைபெற்றது. அங்கு உரையாற்றியபோதே இவ்வாறு கூறினார். மாத்தளை – ரத்வத்தை தோட்டத்தில் தமிழ் தொழிலாளர்களின் தற்காலிக வீடுகள் உதவி முகாமையாளரால் அடித்து நொருக்கப்பட்டமை தொடர்பில் கருத்துரைக்கையிலேயே அவர் மேற்கண்டவாறு தெரிவித்தார். மேலும், “அதுதான் உங்களுக்கு புரிகின்ற பாஷை என்றால் அதை பேச நாம் தயார் என்பதை பொறுப்புடன்
கூறி வைக்க விரும்புகிறேன். நீதிபதி இளஞ்செழியன் தனது தீர்ப்பு ஒன்றில், தற்காப்புக்காக திருப்பி அடிக்கும் உரிமையின் சட்ட வரம்பு பற்றி கூறியுள்ளார். அதையே நான் இங்கு பிரதி
பலிக்கிறேன்.
ஜனாதிபதி ரணில் விக்கிரமசிங்க எம்மை பேச்சுக்கு அழைக்கிறார். ஆனால், நாம் பலமுறை சொல்லியும் அவரின் அரசு எமது மக்களுக்கு எதிராக பெருந்தோட்ட நிர்வாகங்கள் நடத்தும் அராஜகங்களை கண்டும் காணாமல் இருக்கிறது.
ஆகவே, பெருந்தோட்டங்களில் எமது மக்களின் இயல்பு வாழ்கைக்கு உத்தரவாதம் தராவிட்டால், தமிழ் முற்போக்கு கூட்டணி ஜனாதிபதியுடன் பேச்சில் கலந்துக்கொள்ளும் முடிவை மறுபரிசீலனை செய்யும் – என்றார்.
