வெளிநாட்டு வேலைகளில் ஈடுபடும் தொழிலாளர்களுக்கான உத்தேச வீட்டுத் திட்டத்திற்கு தேவையான நிதியுதவியை இலங்கை வெளிநாட்டு வேலைவாய்ப்பு பணியகம் வழங்கும் என தொழிலாளர் மற்றும் வெளிநாட்டு வேலைவாய்ப்பு அமைச்சர் மனுஷ நாணயக்கார தெரிவித்துள்ளார்.
வீடமைப்புத் திட்டம் தொடர்பாக அமைச்சரவையில் சமர்ப்பிக்கப்படவுள்ள அமைச்சரவைப் பத்திரம் தொடர்பான முன்னேற்ற மீளாய்வுக் கூட்டம் நேற்று முன்தினம் (08) இடம்பெற்றவேளையிலேயே, இந்த தீர்மானங்கள் எடுக்கப்பட்டுள்ளன.
தேசிய வீடமைப்பு அபிவிருத்தி அதிகார சபை இலங்கை வெளிநாட்டு வேலைவாய்ப்பு பணியகத்துடன் இணைந்து இத்திட்டத்தை நடைமுறைப்படுத்துகிறது.
மேலும், இது தொடர்பான அமைச்சரவைப் பத்திரத்தை விரைவாகத் திருத்தம் செய்து அமைச்சரவையில் சமர்ப்பிக்க தேவையான நடவடிக்கைகளை மேற்கொள்ளுமாறும் அமைச்சர் மனுஷ நாணயக்கார அதிகாரிகளுக்கு பணிப்புரை விடுத்துள்ளார்.
