மட்டக்களப்பில் மதுபானசாலையில் மதுபானத்தை வாங்கிக் கொண்டு பணம் கொடுக்காது ஓட்டோவில் தப்பி ஓடிய பொலிஸ் இன்ஸ்பெக்டர் சேவையில்இருந்து நேற்று முன்தினம் சனிக்கிழமை இடை நிறுத்தப்பட்டுள்ளார் எனப் பொலிஸ் உயர் அதிகாரி ஒருவர் தெரிவித்தார்.
மட்டு நகரிலுள்ள மதுபானசாலைகள் இரண்டில் கடந்த வெள்ளிக்கிழமை பகல் ஓட்டோவில் சென்று மதுபானசாலையில் தலா அரைப் போத்தல் மதுபானத்தை வாங்கிவிட்டுப் பணம் ஓட்டோவில் இருப்பாதாகவும் கொண்டுவந்து தருவார் எனவும் தெரிவித்து மதுபானத்தை வாங்கிக் கொண்டு பணத்தை கொடுக்காது ஓட்டோவில் தப்பி ஓடிய சம்பவம் அங்கு பொருத்தப்பட்டிருந்த சிசிரிவி கமராவில் பதிவாகியமையுடன் அது பற்றிய செய்தி ஊடகங்களிலும் வெளியாகியது.
வாகரை பொலிஸ் நிலையத்தில் கடமையாற்றிவரும் அந்தப் பொலிஸ் இன்ஸ்பெக்டர் சம்பவதினம் பொலிஸ் நிலையத்தில் இருந்து மட்டக்களப்பிற்குச் செல்கிறார் எனக் கடமைக் கையேட்டில் பதிவிட்டுவிட்டு வெளியேறி, இந்த மோசடியில் ஈடுபட்ட பின்னர் அவர் பொலிஸ் நிலையத்துக்குத் திரும்பாது தலை மறைவாகியுள்ளார். இந்தப் பொலிஸ் இன்ஸ்பெக்டர் ஏற்கனவே தங்க மாலை அறுத்த குற்றச்சாட்டு உட்பட 7 குற்றச்சாட்டுக்கள் காரணமாக ஏழு தடவைகள் பணி இடை நிறுத்தப்பட்டு மீண்டும் சேவையில் சேர்த்துக் கொள்ளப்பட்டு கடமையாற்றி வருபவர் எனப் பொலிஸாரின் ஆரம்பக் கட்ட விசாரணையில் தெரியவந்துள்ளது. பொலிஸாருக்கு அபகீர்த்தியை ஏற்படுத்திய அவர், உடனடியாகப் பணி இடை நிறுத்தப்பட்டுள்ளார் என பொலிஸ் உயர் அதிகாரி தெரிவித்தார்.
