வாழைச்சேனை இந்துக் கல்லூரி தேசிய பாடசாலையின் பழைய மாணவர் சங்கத்தின் ஏற்பாட்டில் பாடசாலையின் அதிபர் திருமதி.ரி.சுரேஸ் குமார் தலைமையில் நடைபெற்ற நடைபவனியில் பாடசாலையில் மூத்த கல்வியியலாளர்கள், பாடசாலையில் கடமையாற்றிய முன்னாள் அதிபர்கள், ஆசிரியர்கள், பாடசாலை ஆசிரியர்கள், மாணவர்கள் மற்றும் பழைய மாணவர்கள் எனப் பலர் கலந்து கொண்டனர்.
இந்நிகழ்வில் கேக் வெட்டப்பட்டு நிகழ்வு ஆரம்பித்து வைக்கப்பட்டது. அத்துடன் பாடசாலையில் கடமையாற்றி மரணமடைந்த அதிபர்கள்,ஆசிரியர்கள் மற்றும் பழைய மாணவர்களுக்காக மௌன அஞ்சலி செலுத்தப்பட்டது.
இதன்போது வாழைச்சேனை இந்துக் கல்லூரி தேசிய பாடசாலையின் மைதானத்தில் இருந்து ஆரம்பமான நடைபவனி கல் குடாவீதி வழியாக வாழைச்சேனை பிரதான வீதி, முல்லை வீதி, விநாயகபுரம் வீதி வழியாக பேத்தாழை சந்திரகாந்தன் வித்தியாலய வீதி, பேத்தாழை மயான வீதி வழியாக பேத்தாழை கல்குடா வீதியினூடாக வருகை தந்து வாழைச்சேனை இந்துக் கல்லூரி தேசிய பாடசாலையை வந்தடைந்தது.
குறித்த நடைபவனியில் வாழைச்சேனை இந்துக்கல்லூரி தேசிய பாடசாலையின் பான்ட் மாணவர்களின் வரவேற்புடன், பாடசாலையின் கராத்தே மாணவர்கள், சுற்றாடல் பகுதி, மாணவ தலைவர்கள், சகிதம் பவனியாக கலந்து கொண்டனர்.
அத்தோடு 1996 ஆம் ஆண்டு உயர்தர பிரிவு மாணவர்கள் தொடக்கம் 2022 ஆம் ஆண்டு உயர்தர பிரிவு மாணவர்கள் வரையான மாணவர்களால் வாகனங்கள் கண்களை கவரும் வகையில் வடிவமைக்கப்பட்டிருந்ததுடன் இசை முழங்க பழைய மாணவர்களின் வாசகங்கள் அடங்கிய பதாதைகளுடன் நடனமாடி பழைய மாணவர்கள் நடைபவனியில் கலந்து கொண்டனர்.
குறித்த நடைபவனியைப் பார்வையிடுவதற்கு பெரும்பாலான மக்கள் வீதியோரமாக குழுமி நின்றனர். அவர்கள் நடைபவனியை பார்வையிட்டு மகிழ்ந்ததுடன், கடந்த வருடமும் இதே நாளில் பாடசாலை தினத்தினை முன்னிட்டு நடைபவனி இடம்பெற்றமை குறிப்பிடத்தக்கது.
