ஜாஎல பகுதியில் கஞ்சா விற்பனையில் ஈடுபட்ட தாயையும் மகனையும் பொலிஸார் கைது செய்துள்ளனர்.
திருமணத்திற்கு தேவையான பணத்தை பெற்றுக்கொள்வதற்காக கஞ்சா விற்பனையில் ஈடுபட்டதாக பொலிஸார் தெரிவித்துள்ளனர்.
24 வயதான இளைஞனும் அவருக்கு உறுதுணையாக இருந்த தாயாருமே இவ்வாறு கைது செய்யப்பட்டுள்ளனர். அவர்களிடம் இருந்து 2 கிலோ 170 கிராம் கஞ்சா பறிமுதல் செய்யப்பட்டது.
எதிர்வரும் ஆகஸ்ட் மாதம் திருமணம் நடைபெறவுள்ள நிலையில், அதற்காக 15 இலட்சம் ரூபா தேவைப்பட்டதாக அவர்கள் தெரிவித்துள்ளனர்.
தனது தந்தை வேலையில் இருந்து பெற்ற பணத்தை இதற்காக பயன்படுத்திய அவர், வாங்கிய கஞ்சாவை தனது நண்பருடன் சேர்ந்து தனது தாயின் உதவியுடன் சிறிய அளவில் விற்பனை செய்து வந்துள்ளார்.
கஞ்சாவை வாங்கிய 57 வயதுடைய நபரை பொலிசார் கைது செய்து விசாரணையின் போது சம்பவம் தெரியவந்துள்ளது.
பின்னர் வீட்டுக்குச் சென்ற பொலிஸார் கஞ்சா விற்பனைக்கு உதவிய இளைஞன் மற்றும் அவரது தாயாரை கைது செய்துள்ளனர்.
