பொலிஸ் மா அதிபர் மற்றும் விசேட அதிரடிப்படைத் தளபதி ஆகியோரின் நேரடிக் கண்காணிப்பின் கீழ், நாளுக்கு நாள் அதிகரித்து வரும் பாதாள உலகக் குழுக்களை அழிக்கும் பாரிய நடவடிக்கை நாளை திங்கட்கிழமை (18ஆம் திகதி) மேல் மற்றும் தென் மாகாணங்களை மையமாகக் கொண்டு ஆரம்பிக்கப்படவுள்ளது.
இந்தப் பிரதேசங்களில் செயற்படும் பாதாள உலகக் குழுக்களை அழிப்பதற்காக பொலிஸ் மா அதிபர் திரு.தேஸ்பந்து தென்னகோன் மற்றும் விசேட அதிரடிப்படைத் தளபதி வருண ஜயசுந்தர ஆகியோரின் மேற்பார்வையில் 20 ஆயுதமேந்திய தாக்குதல் பொலிஸ் படையணிகள் அந்தப் பகுதிகளுக்கு அனுப்பப்பட உள்ளன.
இந்த படைகள் பொலிஸ் மா அதிபர் மற்றும் விஷேட அதிரடிப் படைத் தளபதியின் உத்தரவின் பேரில் மட்டுமே செயற்படுவதுடன், அடையாளம் காணப்பட்ட பாதாள உலகக் குழுக்கள் மற்றும் பாதாள உலக உறுப்பினர்களை அழிப்பதற்கு முழுநேரமாகச் செயற்படுகின்றன.
அந்த குற்றச் செயல்கள் இடம்பெற்ற பிரதேசங்களில் உள்ள சில பொலிஸ் நிலையத் அதிகாரிகள் பாதாள உலகக் குழுக்களுக்கு அஞ்சுவதும் வேறு சிலர் பாதாள உலகக் குழுக்களுடன் தொடர்புகளை பேணுவதும்தான் பாதாள உலகக் குற்றச் செயல்கள் வேகமாக அதிகரிப்பதற்குக் காரணம் என அறியப்பட்டுள்ளது.
இதன்படி, பாதாள உலகத்தை அடக்கத் தவறிய 62 பிரதேசங்களின் நிலையத் தளபதிகளுக்கு எதிராக பொலிஸ் மா அதிபர் சிவப்பு அறிவித்தல் விடுத்துள்ளார்.
62 அதிகாரிகளையும் கொழும்புக்கு வரவழைத்த பொலிஸ் மா அதிபர், அவர்களுக்கு கடும் எச்சரிக்கை விடுத்துள்ளதுடன், இனிமேல் அந்தப் பகுதிகளில் பாதாள உலகக் குற்றச் செயல்கள் இடம்பெற்றால், நிலைய பொறுப்பு அதிகாரி பதவியில் இருந்து நீக்கப்பட்டு, சாதாரண கடமைகளுக்கு நியமிக்கப்படுவார்கள் எனவும் எச்சரித்துள்ளார். .
பாதாள உலக குற்றச் செயல்கள் வேகமாக அதிகரித்து வரும் தென் மாகாணத்தில் பல அதிகாரிகளை இடமாற்றம் செய்ய பொலிஸ் தலைமையகம் ஏற்பாடு செய்துள்ளது.
இதன்படி, தென் மாகாணத்திற்கு பொறுப்பான சிரேஷ்ட பிரதி பொலிஸ் மா அதிபர் சஜீவ மெதவத்த பொலிஸ் தலைமையகத்திற்கு அழைக்கப்பட்டு, சிரேஷ்ட பிரதி பொலிஸ் மா அதிபர் மகேஷ் சேனாரத்ன நியமிக்கப்பட்டுள்ளார்.
மேலும், எதிர்வரும் நாட்களில் தென் மாகாணத்தில் இருந்து சுமார் 10 பிரதேச சிரேஷ்ட பொலிஸ் அத்தியட்சகர்கள் மற்றும் நிலைய கட்டளைத் தளபதிகளை நீக்குவதற்கு பொலிஸ் மா அதிபர் நடவடிக்கை மேற்கொண்டு வருகின்றார்.
