மட்டக்களப்பு சொல்லிசை பாடகர் CKR பிரியன் என்பவர் மீது அடையாளம் தெரியாத நபர்களால் வாள் வெட்டுத்தாக்குதல் ஒன்று கடந்த 24/04/2023 அன்று இரவு நடாத்தப்பட்டுள்ளது.
இந்த கொடூர தாக்குதலுக்கு இலக்கான பாடகர் மண்டூர் வைத்தியசாலையில் அனுமதிக்கப்பட்டு அதன் பின்னர் களுவாஞ்சிகுடி வைத்தியசாலைக்கு அழைத்துச் செல்லப்பட்டுள்ளார். வெட்டுக்காயங்கள் தீவிரமாக இருந்தபடியால் மேலும் அதிக சிகிச்சை தேவை என்ற பட்சத்தில் உடனடியாக மட்டக்களப்பு போதனா வைத்தியசாலை அவசர சிகிச்சை பிரிவில் அனுமதிக்கப்பட்டு 28/04/2023 அன்று போதுமான சிகிச்சையினால் உயிர் பிழைத்த பிரியனுக்கு ஒட்டுறுப்பு அறுவை சிகிச்சையும் இடம்பெற்றுள்ளது.
இது குறித்து வாள் வெட்டுக்கு இலக்கானவருடன் எமது battinaatham ஊடகம் நேற்று தொடர்பை ஏற்படுத்தியிருந்த போது இரவுவேளை தனது சொந்த ஊரில் இருந்து மண்டூரிலுள்ள கடையில் உணவு வாங்கச்சென்றபோது அதே ஊரைச் சேர்ந்த நபர் ஒருவர் கூரிய வாளால் தாக்கிவிட்டு தப்பிச்சென்றதாகவும், சம்பவம் குறித்து அவரது உறவினர்கள் வெல்லாவெளி பொலிஸில் புகார் அளித்திருந்தவேளை வாள் வெட்டை நடத்தியவரை வெல்லாவெளி பொலிஸார் கைது செய்து களுவாஞ்சிகுடி நீதிமன்றத்தில் முன்னிலை படுத்தப்பட்ட பின்னர் குற்றவாளி குற்றத்தை ஒப்புக்கொண்டு பிணையில் விடுதலை செய்யப்பட்டுள்ளார் எனவும் கூறினார்.
