இலங்கையில் வெசாக் தினகொண்டாட்டங்கள் வெகு விமர்சையாக நடந்து வரும் நிலையில் வெசாக் தினத்தை முன்னிட்டு மட்டக்களப்பு சிறைச்சாலையில் இருந்து 14 ஆண் கைதிகள் இன்று (5) ஜனாதிபதி வழங்கிய பொது மன்னிப்பின் அடிப்படையில் விடுதலை செய்யப்பட்டுள்ளனர்.
வெசாக் தினத்தை முன்னிட்டு ஆண்டுதோறும் ஜனாதிபதியினால் பொது மன்னிப்பு வழங்கப்பட்டு நாட்டில் உள்ள அனைத்து சிறைச்சாலைகளிலும் இருந்து குறிப்பிட்ட எண்ணிக்கையிலான கைதிகள் விடுதலை செய்யப்படுவர்.
அதன்படி, இவ்வருடம் 988 கைதிகளை விடுதலை செய்ய சிறைச்சாலைகள் திணைக்களம் நடவடிக்கை எடுத்துள்ளது.
அதற்கமைய, மட்டக்களப்பு சிறைச்சாலை அத்தியட்சகர் நல்லையா பிரபாகரன் தலைமையில், பிரதம ஜெயிலர் உள்ளிட்ட சிறைச்சாலை உத்தியோகத்தர்களின் முன்னிலையில் 14 கைதிகள் விடுவிக்கப்பட்டுள்ளனர்.
சிறு குற்றங்கள் புரிந்து தண்டனை பெற்றவர்கள் மற்றும் தண்டப்பணம் செலுத்தாமல் சிறைத் தண்டனை பெற்றவர்களுமே இன்றைய தினம் விடுதலையாகியுள்ளமை குறிப்பிடத்தக்கது.
