கடந்த சில நாட்களாக இலங்கை பூராகவும் வெள்ளை வேனில் சிறுவர்களை கடத்தும் கும்பல் ஒன்று ஆங்காங்கே சிறுவர்களை கடத்த முற்படுவதாக செய்திகள் வெளிவந்த வண்ணம் காணப்படுகிறது.
இது குறித்து வாட் ஆப் செயலி மூலமாக ஒலிபதிவொன்றும் பரவலாக பேசபடும் ஒரு செய்தியாக வலம் வந்து கொண்டிருந்தது.
இந்நிலை இப்படியிருக்க நேற்றைய தினம் தலைமன்னார் பொலிஸ் பிரிவுக்குட்பட்ட கிராம பகுதியில் வியாபார பொருட்களை ஏற்றி வந்த வான் ரக வாகனம் ஒன்று இரு சிறுவர்களுக்கு இனிப்பு பொருட்களை வழங்கி கடத்துவதற்கு முற்பட்டிருந்ததாக தெரிவித்து பொது மக்கள் ஒன்றிணைந்து அவர்களை பிடித்துள்ளனர்.
நேற்று (11) மதியமளவில் வாகனத்தில் வியாபார பொருட்களை விற்பனை செய்ய வந்த வாகனம் ஒன்றில் இருந்த ஓட்டுநர் இவ் வீதி வழியாக பயணித்த இரு சிறுமிகளுக்கு இனிப்பு பொருட்களை வழங்கி வாகனத்தில் கடத்த முற்பட்ட சமயம் இரு பிள்ளைகளும் தப்பி சென்று கிராமத்தலைவர்களுக்கு தெரிவித்த நிலையில் கிராம மக்கள் இணைந்து குறித்த வாகனத்தையும் வாகன சாரதி மற்றும் உதவியாளர்களை மடக்கி பிடித்துள்ளனர்.
குறித்த சிறுமிகள் தப்பியோடி ஒழிந்த நிலையில் அவர்களுக்கு பின்னால் வாகனத்தில் வந்தவர்கள் துரத்தி கொண்டு வந்ததாகவும் வாகனத்தினுள் வெளிநாட்டு நபர் ஒருவர் இருந்ததாகவும் பாதிக்கப்பட்ட சிறுமி பொலிஸார் முன்னிலையில் வாக்கு மூலம் அளித்திருந்தார்.
மேலும் வாகனத்தை சோதித்த நிலையில் வெளிநாட்டவர் இருக்கவில்லை என்பதுடன் வாகனத்தில் இருந்த இரு சந்தேக நபர்களையும் பொதுமக்கள் தலைமன்னார் பொலிஸாரிடம் ஒப்படைத்த நிலையில் தலை மன்னார் பொலிஸார் மேலதிக விசாரனைகளை மேற்கொண்டு வருகின்றனர்.
