ஜனாதிபதி மாளிகை, செயலகம் மற்றும் பிரதமரின் உத்தியோகபூர்வ இல்லமான அலரி மாளிகையை கொழும்பு நகருக்கு வெளியே மாற்றத் தீர்மானிக்கப்பட்டுள்ளது. சிறீ ஜெய வர்த்தனபுர – கோட்டை சுற்றுலா தளமாக மட்டுமே திறக்கப்படும் என்று அறிவிக்கப்பட்டுள்ளது.
ஜனாதிபதி ரணில் விக்கிரமசிங்கவின் பணிப்புரையின் பேரில் சிறீ ஜெயவர்த்தனபுர – கோட்டை பிரதேசத்தில் ஒரே இடத்தில் நிர்வாக வளாகத்தை அமைப்பதற்கு மாற்று காணியை தேடி வருவதாக நகர அபிவிருத்தி அதிகார சபையின் பணிப்பாளர் நாயகம் பிரசாத் ரணவீர தெரிவித்துள்ளார்.
உத்தேச ‘புதிய கொழும்பு பாரம்பரிய நகர திட்டத்தின்’ கீழ், ஜனாதிபதி மாளிகை, செயலகம் மற்றும் அலரி மாளிகை கட்டடம் மற்றும் மலர் வீதியில் உள்ள பிரதமர் அலுவலகம் ஆகியவை சுற்றுலா தலங்களாக பாதுகாக்கப்படும்.இந்தத் திட்டத்தின் கீழ், கொழும்பு நகரில் உள்ள மற்ற கட்டடங்கள் முதலீட்டாளர்களுக்கு குத்தகைக்கு மீண்டும் வழங்கப்படவுள்ளது.
இதன்படி, பொது தபால் நிலையம், வெளிவிவகார அமைச்சு கட்டடம், பொலிஸ் தலைமையகம், விமானப்படை தலைமையகம், கடற்படை தலைமையகம், விசும்பய, ஷ்ரவஸ்தி (முன்னாள் பாராளுமன்ற உறுப்பினர் விடுதி), கபூர் கட்டடம், ஜவத்தை வீதியிலுள்ள நீர்ப் பாசன திணைக்கள கட்டடம், வெலிக்கடை சிறைச்சாலைகள் மற்றும் பழைய பாதுகாப்பு காலி முகத்திடலில் உள்ள அமைச்சுக் கட்டடம் என்பன குத்தகைக்கு விடப்படுவதற்கு அடையாளம் காணப்பட்டுள்ளன என்றும் கூறப்பட்டது.
