பிலியந்தலை பிரதேசத்தில் வாகன விபத்து; மூவர் வைத்தியசாலையில் அனுமதி!

பிலியந்தலை பிரதேசத்தில் நேற்று (02) இடம்பெற்ற விபத்தில் கணவர், மனைவி உட்பட மூவர் காயமடைந்துள்ளதாக பிலியந்தலை பொலிஸார் தெரிவித்தனர்.

இது தொடர்பில் தெரியவருவதாவது,

காயமடைந்த கணவர், மனைவி இருவரும் களுபோவில வைத்தியசாலையை நோக்கி முச்சக்கரவண்டியில் பயணித்துக்கொண்டிருக்கும் போது பாடசாலையை முடித்து வீட்டிற்குச் செல்வதற்காக பஸ் தரிப்பிடத்தில் காத்திருந்த மாணவியொருவரை கண்டுள்ளனர்.

இந்நிலையில், கணவர், மனைவி இருவரும் பாடசாலை மாணவியை முச்சக்கரவண்டியில் ஏற்றி பிலியந்தலை பிரதேசத்தை நோக்கிப் பயணித்துக் கொண்டிருந்த போது முச்சக்கரவண்டியுடன் இரண்டு கார்கள் மோதியதில் இந்த விபத்து இடம்பெற்றுள்ளது.

இந்த விபத்தின் போது, முச்சக்கரவண்டியில் பயணித்த 74 வயதுடைய கணவரும் 68 வயதுடைய மனைவியும் பாடசாலை மாணவியும் காயமடைந்துள்ளனர்.

காயமடைந்தவர்கள் சிகிச்சைக்காக வைத்தியசாலையில் அனுமதிக்கப்பட்டுள்ளார்கள்.

இது தொடர்பான மேலதிக விசாரணைகளை பிலியந்தலை பொலிஸார் மேற்கொண்டு வருகின்றனர்.