16 வயதுடைய பாடசாலை மாணவியை 22 மாணவர்கள் வன்புணர்வுக்கு உட்படுத்தியதாக கூறப்படும் சம்பவம் தொடர்பான மருத்துவப் பரிசோதனையை மேற்கொண்ட ஹம்பாந்தோட்டை மாவட்ட பொது வைத்தியசாலையின் சட்ட வைத்திய அதிகாரி தேசிய சிறுவர் பாதுகாப்பு அதிகார சபையால் கைது செய்யப்பட்டுள்ளார்.
தனது மகளை பரிசோதித்தபோது குறித்த ஹம்பாந்தோட்டை வைத்திய அதிகாரி திட்டியதாகவும், மிரட்டும் வகையில் நடந்து கொண்டதாகவும், குறித்த சிறுமியின் தாய் கடந்த வாரம் தனமல்வில பொலிஸார் மற்றும் சிறுவர் பாதுகாப்பு அதிகாரசபையில் முறைப்பாடு செய்திருந்தார்.
ஜே.எம்.ஓ.வின் நடவடிக்கையின் பிறகு தனது மகள் மனநிலை பாதிக்கப்பட்டுள்ளதாகவும் சிறுமி பொய் சொன்னதாக குறித்த அதிகாரி குற்றம் சாட்டியதாகவும் சிறுமியின் தாய் கூறினார்.
இதனையடுத்து குறித்த சட்ட வைத்திய அதிகாரி நேற்று சனிக்கிழமை கைது செய்யப்பட்டு, ஹம்பாந்தோட்டை நீதவான் நீதிமன்றில் ஆஜர்படுத்தப்பட்டதன் பின்னர் 300,000 ரூபாய் பிணையில் விடுவிக்கப்பட்டார்.
முன்னதாக, சம்பவத்தில் தொடர்புடைய 20க்கும் மேற்பட்ட மாணவர்கள் கைது செய்யப்பட்டு விளக்கமறியலில் வைக்கப்பட்டனர்.
மேலும், சம்பவத்தை மூடிமறைத்த குற்றச்சாட்டில் சிறுமி படித்த பாடசாலையின் அதிபர் உட்பட நான்கு ஆசிரியர்கள் முன்னதாக கைது செய்யப்பட்டு நீதிமன்றத்தில் ஆஜர்படுத்தப்பட்ட பின்னர் பிணையில் விடுவிக்கப்பட்டமை குறிப்பிடத்தக்கது.
