தங்காலை கதுருபொகுன பகுதியில் பொலிஸ் கான்ஸ்டபில் ஒருவரை பொல்லால் தாக்கி கொலை செய்த சம்பவத்துடன் தொடர்புடைய பிரதான சந்தேக நபர் உட்பட மூன்று பேர் தங்காலை பொலிஸ் குற்றப்புலனாய்வு பிரிவினரால் கைது செய்யப்பட்டுள்ளனர்.
இது தொடர்பில் தெரியவருவதாவது,
இந்த கொலை சம்பவம் தொடர்பில் தங்காலை பொலிஸ் குற்றப்புலனாய்வு பிரிவினருக்குக் கிடைத்த தகவலின் பேரில் மேற்கொள்ளப்பட்ட சுற்றிவளைப்பில் பிரதான சந்தேக நபர் கண்டி பிரதேசத்தில் வைத்து நேற்று ஞாயிற்றுக்கிழமை (18) கைது செய்யப்பட்டுள்ளார்.
தங்காலை கதுருபொகுன பகுதியில் வசிக்கும் 33 வயதுடைய நபரொருவரே கைது செய்யப்பட்டுள்ளார்.
கைது செய்யப்பட்ட பிரதான சந்தேக நபரிடமிருந்து T-56 ரக துப்பாக்கி , 12 தோட்டாக்கள் என்பன கைப்பற்றப்பட்டுள்ளன.
இதனையடுத்து, கைது செய்யப்பட்ட பிரதான சந்தேக நபரிடம் மேற்கொள்ளப்பட்ட விசாரணையில், தங்காலை பிரதேசத்தில் உள்ள பாழடைந்த வீடொன்றில் தலைமறைவாக இருந்த ஏனைய இரண்டு சந்தேக நபர்களும் இன்று திங்கட்கிழமை (19) காலை கைது செய்யப்பட்டுள்ளதாக பொலிஸார் தெரிவித்துள்ளனர்.
