மட்டக்களப்பில் பாடசாலை ஆசிரியர் ஒருவர் சிறுவர் நன்னடத்தை அதிகாரிகளுக்கு கிடைத்த முறைப்பாட்டின் அடிப்படையில் கைது செய்யப்பட்டுள்ளார்.
சம்பவம் தொடர்பில் மேலும் தெரியவருவதாவது,
மட்டக்களப்பில் உள்ள பிரதேச பாடசாலை ஒன்றில் கல்விகற்றுவரும் 16 வயதுடைய மாணவியை கடந்த 11ம் திகதி ஞாயிற்றுக்கிழமை, ஆலயம் ஒன்றின் தரிசனத்தில் ஈடுபட்டுக் கொண்டிருந்த போது, அதே பாடசாலையில் கல்வி கற்பித்துவரும் 44 வயதுடைய ஆசிரியர் தனது மோட்டார் சைக்கிளில் ஏற்றிக் கொண்டு அங்கிருந்து மட்டுநகர் பகுதிக்கு பிராயாணித்துள்ளார்.
இதனை கண்டுகொண்ட கிராம இளைஞர்கள் அவர்களை பின் தொடர்ந்து வந்து நகர்பகுதியில் வைத்து, பிடித்து நையப்புடைப்பு செய்த நிலையில் அவர் அங்கிருந்து சிறுமியுடன் தப்பி ஓடியுள்ளார். இது தொடர்பாக சிறுவர் நன்னடத்தை அதிகாரிகளுக்கு கிடைத்த தகவலின் பிரகாரம் குறித்த ஆசிரியருக்கு எதிராக பொலிஸ் நிலையத்தில் முறைபாடு செய்யப்பட்டுள்ளது.
இதனையடுத்து குறித்த ஆசிரியரை கடந்த வியாழக்கிழமை (15) ஏறாவூர் பொலிஸார் கைது செய்து, ஏறாவூர் நீதிமன்றில் முன்னிலைப்படுத்திய போது, அவரை 23 ம் திகதி வரை விளக்கமறியலில் வைக்குமாறு நீதவான் உத்தரவிட்டுள்ளார்.
