முல்லைத்தீவு, உடையார்கட்டு குரவில் பகுதியில் ஐஸ் போதைப்பொருளை பயன்படுத்த தயாராக இருந்த இளைஞர்கள் அறுவரை நேற்று முன்தினம் செவ்வாய்க்கிழமை (27) கைது செய்துள்ளதாக புதுக்குடியிருப்பு பொலிஸார் தெரிவித்துள்ளனர்.
குறித்த கைது சம்பவம் தொடர்பில் மேலும் தெரியவருகையில்,
புதுக்குடியிருப்பு பொலிஸ் பிரிவிற்குட்பட்ட உடையார்கட்டு குரவில் பகுதியிலுள்ள யாருமற்ற வீடொன்றில் சட்டவிரோத செயற்பாடுகள் இடம்பெற்று வருவதாக புதுக்குடியிருப்பு பொலிஸாருக்கு கிடைத்த தகவலையடுத்து மேற்கொண்ட விசேட தேடுதல் நடவடிக்கையின் போது குறித்த 6 இளைஞர்களும் கைதுசெய்யப்பட்டுள்ளனர்.
கைது செய்யப்பட்ட இளைஞர்களிடமிருந்து 7 தொலைபேசிகளும், 17000 ரூபா பணம் என்பவற்றுடன் சிறு சிறு 7 பொதிகளில் 90 மில்லி கிராம் ஐஸ் போதைப்பொருளும் கைப்பற்றப்பட்டுள்ளன.
உடையார்கட்டு குரவில் பகுதியினை சேர்ந்த நால்வரும், புதுக்குடியிருப்பு பகுதியினை சேர்ந்த இருவரும் 17,18,18,21,23 மற்றும் 24 வயதுடைய இளைஞர்கள் அறுவரை புதுக்குடியிருப்பு பொலிஸார் கைது செய்துள்ளனர்.
இதனையடுத்து, இளைஞர்களிடம் மேற்கொள்ளப்பட்டுவரும் மேலதிக விசாரணைகளின் பின்னர் முல்லைத்தீவு நீதவான் நீதிமன்றில் முற்படுத்த நடவடிக்கை மேற்கொள்ளப்பட்டு வருவதாகவும் பொலிஸார் தெரிவித்துள்ளனர்.
