மட்டக்களப்பு பிரதான அரச பேருந்து தரிப்பிடத்தில் அமைந்துள்ள மலசல கூடமானது சுத்தமின்மையாக காணப்படுவதாக கிடைக்கப்பெற்ற முறைப்பாட்டின் அடிப்படையில் மட்டு மாநகர சபையின் கவனத்திற்கு கொண்டு சென்று உடனடியாக நடவடிக்கை மேற்கொள்ளப்பட்டுள்ளது.
சம்பவம் தொடர்பில் மேலும் தெரியவருதாவது,
மட்டக்களப்பு பிரதான அரச பேருந்து தரிப்பிடத்தில் அமைந்துள்ள மலசல கூடத்தை பயன்படுத்திய பொதுமகன், குறித்த மலசல கூடம் சுத்தமின்மையாக காணப்படுவதாக மட்டு ஊடகம் ஒன்றில் கவலை தெரிவித்துள்ளார்.
இது தொடர்பில் குறித்த ஊடகமானது, மட்டு மாநகர சபை ஆணையாளரின் கவனத்திற்கு கொண்டுசென்ற நிலையில், உடனடியாக ஆணையாளரினாலும் நடவடிக்கை மேற்கொள்ளப்பட்டது.
அதன் அடிப்படையில் சம்பவ இடத்திற்கு உடனடி விஜயம் மேற்கொண்ட பொதுச் சுகாதார பரிசோதகர், குறித்த மலசல கூடத்தை பார்வையிட்டதுடன், உடனடியாக துப்பரவு பணிகளை மேற்கொள்ளுமாறும் குறித்த மலசல கூட குத்தகைதாரர்களிடம் தெரிவித்திருந்தார்.
அதேசயம் குறித்த மலசல கூடத்தை துப்பரவாக பேணுமாறும் குறித்த பொதுச் சுகாதார பரிசோதகரால் எச்சரிக்கையும் விடுக்கப்பட்டுள்ளது.
