பெண் பொலிஸ் அதிகாரி ஒருவரின் கால்களைக் காணொளி எடுத்து சமூக ஊடகங்களில் பதிவிட்டதாகக் கூறப்படும் இரண்டு இளைஞர்கள் நேற்று (29) கைது செய்யப்பட்டுள்ளதாகச் சிலாபம் பொலிஸார் தெரிவித்தனர்.
சிலாபம் பங்கதெனிய மற்றும் குமாரகட்டுவ ஆகிய பிரதேசங்களைச் சேர்ந்த இரு இளைஞர்களே கைது செய்யப்பட்டுள்ளனர்.
இது தொடர்பில் தெரியவருவதாவது,
இந்த இளைஞர்கள் இருவரும் முறைப்பாடு ஒன்று தொடர்பில் விசாரணைகளுக்காகக் கடந்த 27 ஆம் திகதி அன்று பொலிஸ் நிலையத்திற்குச் சென்றுள்ளனர்.
இதன்போது, அங்குக் கடமையில் ஈடுபட்டிருந்த பெண் பொலிஸ் அதிகாரி ஒருவரின் சீருடை காற்றினால்அங்கும் இங்கும் அசைந்துள்ள நிலையில் இந்த இளைஞர்கள் இருவரும் அந்த பெண் பொலிஸ் அதிகாரியின் கால்களைக் காணொளியாக எடுத்து அதனை சமூக ஊடகங்களில் பதிவிட்டுள்ளனர்.
இதனையடுத்து, பாதிக்கப்பட்ட பெண் பொலிஸ் அதிகாரி இது தொடர்பில் பொலிஸ் நிலையத்தில் முறைப்பாடு அளித்துள்ளார்.
பின்னர் பொலிஸாரால் மேற்கொள்ளப்பட்ட விசாரணையில் சந்தேக நபர்களான இளைஞர்கள் இருவரும் கைது செய்யப்பட்டுள்ளனர்.
