ராகவா லாரன்ஸ் நடிக்கும் ‘பென்ஸ்’ திரைப்படத்தின் க்ளிம்ப்ஸ் வீடியோவை நேற்று (29) படக்குழு வெளியிட்டுள்ளது.
இயக்குநர் லோகேஷ் கனகராஜ் ‘ஜி ஸ்குவாட்’ என்ற பெயரில் தயாரிப்பு நிறுவனம் ஒன்றை தொடங்கியுள்ளார். இதன் முதல் தயாரிப்பாக ‘ஃபைட் கிளப்’ திரைப்படம் கடந்த ஆண்டு வெளியானது.
இந்த தயாரிப்பு நிறுவனத்தின் அடுத்த தயாரிப்பாக ராகவா லாரன்ஸ் நடிப்பில் ‘பென்ஸ்’ என்ற திரைப்படம் உருவாகி வருகிறது. இதை லோகேஷ் கனகராஜ் கதை எழுத, பாக்கியராஜ் கண்ணன் இயக்குகிறார். இயக்குநர் பாக்கியராஜ் கண்ணன் ‘ரெமோ’, ‘சுல்தான்’ உள்ளிட்ட திரைப்படங்களை இயக்கியுள்ளார்.
இந்தநிலையில் ராகவா லாரன்ஸின் பிறந்தநாளையொட்டி பென்ஸ் திரைப்படத்தின் க்ளிம்ப்ஸ் வீடியோ ஒன்றை படக்குழு வெளியிட்டுள்ளது. அதில், தலையில் சிவப்பு ஹெல்மெட்டுடன் திரையில் தோன்றும் லோகேஷ் கனகராஜ், தன்னுடைய யுனிவர்ஸுக்கு லாரன்ஸை வரவேற்பதாக தெரிவித்துள்ளார்
இதன் மூலம் லோகேஷின் எல்சியுவில் ஏற்கெனவே இருக்கும் கைதி டில்லி, விக்ரம், லியோ உள்ளிட்ட கதாபாத்திரங்களுடன் இந்த ‘பென்ஸ்’ கதாபாத்திரமும் இணையும் என்று தெரிகிறது.
விரைவில் இப்படத்தின் படப்பிடிப்பு தொடங்க உள்ளதாக கூறப்படுகிறது. இப்படத்தை ஜி ஸ்குவாட் உடன் இணைந்து பேஸன் ஸ்டூடியோஸ், தி ரூட் உள்ளிட்ட நிறுவனங்களும் தயாரிக்கின்றன.
