இலங்கையின் பாடசாலைப் பரீட்சை வரலாற்றில் காணப்பட்ட பாரம்பரிய நடைமுறையில் விசேட மாற்றமொன்றை மேற்கொண்டு, இம்முறை நடைபெற்று முடிந்த கல்விப் பொதுத் தராதர சாதாரண தர (O/L) பரீட்சையில் அகில இலங்கை ரீதியில் முதலிடங்களைப் பெற்ற மாணவர்களின் பெயர் விபரங்களை ஊடகங்களுக்கு அதிகாரப்பூர்வமாக வெளியிடப்போவதில்லை என பரீட்சைத் திணைக்களம் தீர்மானித்துள்ளது.
பரீட்சைகள் ஆணையாளர் நாயகம் (Commissioner General of Examinations) நடத்திய விசேட ஊடகவியலாளர் சந்திப்பிலேயே இந்த அதிகாரப்பூர்வ அறிவிப்பு வெளியிடப்பட்டுள்ளது.
இந்த புதிய தீர்மானத்தின் காரணமாக, பரீட்சை முடிவுகள் வெளியான பின்னர் தனியார் பிரத்தியேக வகுப்பு (Tuition) ஆசிரியர்கள் மற்றும் நிறுவனங்கள், ‘தீவின் முதலாமவர் என்னுடைய மாணவர்’ எனக் கூறி மேற்கொள்ளும் விளம்பரங்களுக்கு இனிமேல் இடமிருக்காது என சுட்டிக்காட்டப்பட்டுள்ளது.
மாணவர்களிடையே ஏற்படும் தேவையற்ற மன அழுத்தங்களைக் குறைக்கும் நோக்கோடும், வணிக ரீதியிலான போட்டிகளைத் தடுக்கும் நோக்கோடும் இந்த வரலாற்று முக்கியத்துவம் வாய்ந்த நடவடிக்கை எடுக்கப்பட்டுள்ளதாகத் தெரிவிக்கப்படுகிறது.
