குருந்தூர்மலையில் கடந்த 14ஆம் திகதி பொங்கலை தடுத்து குழப்பம் ஏற்படுத்தியவர்களுக்கு உடந்தையாக செயல்பட்ட – இந்த செயலை தடுத்து நிறுத்தாத மூத்த பொலிஸ் அதிகாரிமீது நடவடிக்கை எடுப்பதாக ஜனாதிபதி ரணில் விக்கிரமசிங்க த. சித்தார்த்தன் எம். பியிடம் உறுதியளித்தார்.
கடந்த வெள்ளிக்கிழமை குருந்தூர் மலையில் தமிழரின் வழிபாட்டு உரிமை மறுக்கப்பட்டது. அங்கு பொங்கலிட்டு வழிபட குருந்தூர்மலை விகாரைபிக்குவும் கும்பல் ஒன்றும் தடை ஏற்படுத்தியது. நீதிமன்ற தீர்ப்பை மீறும் வகையில் அமைந்த இவர்களின் செயலுக்கு பொலிஸார் துணைநின்றிருந்தனர்.
முல்லைத்தீவு மாவட்ட மூத்த பொலிஸ் அதிகாரி ஒருவரின் கண் காணிப்பின் கீழேயே இது முன்னெடுக்கப்பட்டது.இந்த விடயம் குறித்து தமிழ்த் தேசியக் கூட்டமைப்பின் த. சித்தார்த்தன் எம். பி. நேற்று ஜனாதிபதியின் கவனத்துக்குக் கொண்டு வந்தார். இதன் போதே இந்த விடயம் குறித்து முறைப்பாட்டை முழுமையாக தருமாறும் அந்த பொலிஸ் அதிகாரி மீது நடவடிக்கை எடுப்பதாகவும் ஜனாதிபதி உறுதியளித்தார்.
