தமது விண்கலத்தில் ஏற்பட்ட திடீர் கோளாறை சீரமைக்கும் பணிகள் நடைபெற்று வருவதாக ரஷ்ய விண்வெளி ஆய்வு நிறுவனம் தெரிவித்துள்ளது.
நிலவின் தென் துருவத்தை ஆராய்ச்சி செய்வதற்காக இந்தியாவின் இஸ்ரோ சந்திரயான்-3 விண்கலத்தை கடந்த ஜூலை 14 ஆம் திகதி விண்ணில் செலுத்தியது.
அந்த விண்கலம் எதிர்வரும் 23 ஆம் திகதி மாலை நிலவின் தென் துருவத்தில் மென்மையான முறையில் தரையிறங்க உள்ளது.
இந்தியாவுக்கு போட்டியாக ரஷ்யாவும் நிலவை ஆய்வு செய்ய விண்கலமொன்றை செலுத்தி உள்ளது.
இந்த நிலையில் ரஷ்யா கடந்த 10 ஆம் திகதி லூனா – 25 என்ற விண்கலத்தை விண்ணில் செலுத்தியது.
சந்திரயானுக்கு முன்பாகவே எதிர்வரும் 21 ஆம் திகதி நிலவின் தென்துருவத்தில் லூனாவை தரையிறக்க ரஷ்யா திட்டமிட்டுள்ளது.
இதற்கிடையில், கடந்த 17 ஆம் திகதி லூனா-25 விண்கலம் வெற்றிகரமாக நிலவின் சுற்றுவட்டப்பாதைக்குள் நுழைந்தது.
எனினும் விண்கலம் நிலவில் தரையிறங்குவதற்கான இறுதி கட்ட சுற்றுப்பாதையை குறைப்பதில் திடீர் சிக்கல் ஏற்பட்டுள்ளது.
இதன் காரணமாக இறுதி சுற்றுவட்டப்பாதைக்கு அனுப்ப முடியாமல் தற்போதைய பாதையிலேயே லூனா 25 விண்கலம் சுற்றி வருகிறது.
அவசர நிலைமையை ஆராய்ந்து வருவதாகவும், விண்கலத்தில் ஏற்பட்ட திடீர் கோளாறை விரைந்து சீர்செய்யும் பணிகள் நடைபெற்று வருகிறது எனவும் ரஷ்ய விண்வெளி நிறுவனம் தெரிவித்துள்ளது.
