யாழ்ப்பாணத்தில் நடைபெற இருக்கின்ற ஹரிகரனின் இசை நிகழ்ச்சியைத் தொகுத்து வழங்குவதற்காக நடிகை குஷ்பு யாழ்ப்பாணம் வர இருந்த நிலையில், ஈழத் தமிழர்களின் கடும் எதிர்ப்பு காரணமாக அவரது வருகை நிறுத்தப்பட்டுள்ளதாகத் தெரிய வருகின்றது.
தமிழீழ விடுதலைப் புலிகள் தொடர்பில் சர்ச்சைக்குரிய கருத்துக்களை வெளியிட்டதன் காரணமாகவே தற்போது குஷ்புவுக்கு யாழில் கடும் எதிர்ப்புக்கள் எழுந்துள்ளதுடன்,தென்னிந்திய நடிகை குஷ்புவின் யாழ்ப்பாண விஜயமும் இரத்துச் செய்யப்பட்டுள்ளது.
நடிகை குஷ்புவின் கருத்துக்கு வடக்கு கிழக்கு தமிழ் தாயகப் பகுதியில் கடும் எதிர்ப்புக்கள் எழுந்துள்ள நிலையில்,நடிகை குஷ்புவிற்கு பதிலாக தொகுப்பாளினி திவ்யதர்ஷினி வருகைத் தரவுள்ளதாக அறிவிக்கப்பட்டுள்ளது.
இதேவேளை குஷ்புவுக்கு எதிராக காணாமல் ஆக்கப்பட்டவர்களின் உறவினர்கள் மற்றும் சிவில் செயற்பாட்டாளர்கள் உள்ளிட்ட சமூக ஆர்வலர்கள் கடும் கண்டனங்களை வெளியிட்டு வருவதுடன், அவருக்கு எதிரான எதிர்ப்புக்கள் மேலும் வலுத்து வருவதும் குறிப்பிடத்தக்கது.
