மாமனாருக்கும் மருமகனுக்கும் இடையே ஏற்பட்ட வாய்த்தர்க்கம் முற்றியதையடுத்து மண்வெட் டிப் பிடியால் மாமனார் தாக்கியதில் மருமகன் உயிரிழந்தார்.
கிளிநொச்சி – கிருஷ்ணபுரம் பகுதியில் நேற்று செவ்வாய்க்கிழமை காலை இந்தச் சம்பவம் இடம்
பெற்றுள்ளது. இதில், இரண்டு பிள்ளைகளின் தந்தையான ஆறுமுகம்பிள்ளை துஷ்யந்தன் (வயது 34) என்பவரே உயிரிழந்தார்.
சம்பவம் குறித்து மேலும் அறிய வருவதாவது,உயிரிழந்த நபர் குடும்ப முரண்பாடு காரணமாக மனைவியை பிரிந்து வாழ்ந்துள்ளார். இந்த நிலையில், நேற்று காலை அவர் மனைவியிடம் பேசுவதற்காக அவரின் தந்தையின் வீட்டுக்கு சென்றுள்ளார். அந்தச் சமயம் அவரின் மாமனாருக்கும் (மனைவியின் தந்தை) அவருக்கும் இடையே வாய்த்தர்க்கம் ஏற்பட்டுள்ளது. வாய்த்தர்க்கம் கைகலப்பான நிலையில், மாமனார் மருமகனை மண்வெட்டி பிடியால் தாக்கியுள்ளார். இதில் படுகாயமடைந்தவர் உடனடியாக கிளிநொச்சி மருத்துவமனையில் சேர்க்கப்பட்ட போதும் அவர் சிகிச்சை பலனின்றி உயிரிழந்தார். இந்தச் சம்பவம் தொடர்பில் உயிரிழந்தவரின் மாமனார் கைது செய்யப்பட்டுள்ளார்.
மேலதிக விசாரணைகளை கிளிநொச்சி பொலிஸார் மேற்கொண்டு வருகின்றனர்.
