மட்டக்களப்பு மாவட்டத்தில் உள்ள வர்த்தக நிலையங்களை கண்காணிக்கும் விசேட சுற்றி வளைப்புக்கள் மாவட்ட அளவீட்டு அலகுகள்நியமங்கள் சேவைகள் திணைக்கள அதிகாரிகளினால் முன்னெடுக்கப்பட்டது. மக்களுக்கு நிவாரணம் வழங்கும் முகமாக அரசினால் விலை குறைப்புக்கள் மேற்கொள்ளப்பட்டுள்ள நிலையில் அதனை கண்காணிக்கும் விசேட சுற்றிவளைப்புக்கள் நாடுபூராகவும் இடம்பெற்று வருகின்றன. அதனை முன்னிட்டு மட்டக்களப்பு மாவட்ட அரசாங்க அதிபர் திருமதி. கலாமதி பத்மராஜாவின் ஆலோசனை மற்றும் வழிகாட்டுதல்களுக்கு அமைவாக விசேட சுற்றிவளைப்பினை முன்னெடுத்திருந்தனர்.
இதன்போது மட்டக்களப்பு நகர்ப்பகுதி, காத்தான்குடி, செங்கலடி,ஏறாவூர் உள்ளிட்ட பகுதிகளில் உள்ள பொது சந்தைகள், வர்த்தக நிலையங்கள் சோதனைக்குட்படுத்தப்பட்டதுடன், முத்திரையிடப்படாத நிறுவை அளவை உபகரணங்கள், பொதியிடப்பட்டுள்ள உணவுப்பொருட்களில் நிறை மற்றும் உள்ளீடுகள் தொடர்பான விளம்பரப்படுத்தல்கள் என்பது தொடர்பாகவும் பரிசோதிக்கப்பட்டது.
மனித நுகர்விற்கு பொருத்தமில்லாத உணவுப்பொருட்களை விற்பனை செய்த, 29 வர்த்தக நிலையங்களின் உரிமையாளர்களுக்கு எதிராக சட்ட நடவடிக்கை மேற்கொள்வதற்கான முன்னெடுப்புக்கள் மேற்கொள்ளப்பட்டதாக, அளவீட்டு அலகுகள் நியமங்கள் சேவைகள் திணைக்களத்தின் உதவி அத்தியட்சகர் விநாயகமூர்த்தி விக்னேஸ்வரன் தெரிவித்தார்.
