தமிழ்நாட்டிலிருந்து இலங்கைக்கு கடத்த முயன்ற 3 தொன் பீடி இலைகளை பொலிஸார் கைப்பற்றியுள்ளனர்.
தமிழகத்தின் தூத்துக்குடி மாவட்டம் திருச்செந்தூர் அருகே உள்ள ஆலந்தலை கடற்கரை பகுதியில் நேற்று (05) கடலோர பாதுகாப்பு குழும பொலிஸார் கண்காணிப்புப் பணியில் ஈடுபட்டிருந்தனர்.
அப்போது, கடற்கரையில் சந்தேகப்படும்படியாக நின்ற லொறியை பொலிஸார் சோதனையிட்டனர்.
அந்த லொறியில் 87 வெள்ளை நிற சாக்கு மூடைகளில் தலா 35 கிலோ எடை கொண்ட சுமார் 3 தொன் பீடி இலைகள் இருந்தன.
பொலிஸார் நடத்திய விசாரணையில், பீடி இலை பொதிகள் படகு மூலம் இலங்கைக்கு கடத்தப்படவிருந்தமை தெரியவந்தது. இதை அடுத்து, பீடி இலை பண்டல்கள் மற்றும் லொறியை பொலிஸார் கைப்பற்றியுள்ளனர்.
தொடர்ந்து, பறிமுதல் செய்யப்பட்ட பீடி இலைகளை சுங்கத்துறையினரிடம் பொலிஸார் ஒப்படைத்ததை தொடர்ந்து, சுங்கத்துறை அதிகாரிகள் விசாரணை நடத்தி வருகின்றனர்.
