சவூதி அரேபியாவின் தலைநகர் ரியாத்திலுள்ள கிங் காலித் சர்வதேச விமான நிலையத்தின் நான்காவது பயணிகள் முனையம் மீது ஞாயிற்றுக்கிழமை (ஒக்டோபர் 11) அடையாளம் காணப்படாத ஏவுகணைப் பொருள் தாக்கியதில் தீ பரவியதுடன், ஒருவர் உயிரிழந்து 11 பேர் காயமடைந்துள்ளதாகச் சர்வதேச ஊடகங்கள் தெரிவிக்கின்றன.
விமான நிலையத்திற்கு அருகே வந்த மற்றுமொரு குரூஸ் ஏவுகணையைச் சவூதி வான் பாதுகாப்புப் படையினர் இடைமறித்து அழித்ததாக, சவூதி தலைமையிலான இராணுவக் கூட்டணி தெரிவித்துள்ளது.
இதற்கு முன்னதாக, சனிக்கிழமை இடம்பெற்ற தாக்குதலில் 12 பேர் உயிரிழந்ததுடன், 309 பேர் காயமடைந்தனர். தொடர் தாக்குதல்களால் விமான நிலையச் செயற்பாடுகள் பாதிக்கப்பட்டுள்ளதுடன், பல விமானப் பயணங்களும் இரத்துச் செய்யப்பட்டுள்ளன அல்லது மாற்றுப் பாதைகளுக்குத் திருப்பிவிடப்பட்டுள்ளன.
இதற்கிடையில், சவூதி விமான நிலையங்களையும் வான்வெளியையும் பயன்படுத்த வேண்டாம் என ஹூதி கிளர்ச்சியாளர்கள் எச்சரிக்கை விடுத்துள்ளனர். யேமனில் சவூதியின் இராணுவ நடவடிக்கைகள் தொடர்ந்தால் மோதல்கள் மேலும் தீவிரமடையும் என்றும் அவர்கள் எச்சரித்துள்ளனர்.
