அரச சொத்துக்கள் முகாமைத்துவச் சட்டம்; அமைச்சரவை அங்கீகாரம்

அரச சொத்துக்கள் முகாமைத்துவச் சட்டமூலத்தை மீளத் தயாரிப்பதற்கு அமைச்சரவை அங்கீகாரம் வழங்கியுள்ளது.

குறித்த சட்டமூலத்தை அரச வர்த்தமானியில் வெளியிட்டு, பாராளுமன்ற அங்கீகாரத்திற்காகச் சமர்ப்பிப்பதற்கு 2024 ஜூலை 22ஆம் திகதி நடைபெற்ற அமைச்சரவைக் கூட்டத்தில் அனுமதி வழங்கப்பட்டிருந்தது.

எனினும், 2024 ஒக்டோபரில் பாராளுமன்றம் கலைக்கப்பட்டதால், சட்டமூலத்தை நிறைவேற்ற முடியாமல் போனது. இதனையடுத்து, சட்டமூலம் தொடர்பில் மேலதிகமாக ஆராய்வதற்காக அதிகாரிகள் மற்றும் துறைசார் நிபுணர்கள் அடங்கிய குழுவொன்று நியமிக்கப்பட்டது.

அக்குழு சட்டமூலத்தில் மேற்கொள்ளப்பட வேண்டிய திருத்தங்களை அடையாளம் கண்டதுடன், அவற்றை உள்ளடக்கிய புதிய அடிப்படைச் சட்டமூலத்தையும் தயாரித்துள்ளது.

இதற்கமைய, 2024 ஆகஸ்ட் 2ஆம் திகதி அதிவிசேட வர்த்தமானியில் வெளியிடப்பட்ட சட்டமூலம் தொடர்பான மேலதிக நடவடிக்கைகளை இடைநிறுத்தவும், நிபுணர் குழுவினால் தயாரிக்கப்பட்ட அடிப்படைச் சட்டமூலத்தை அடிப்படையாகக் கொண்டு புதிய சட்டமூலத்தைத் தயாரிக்குமாறு சட்ட வரைஞருக்கு ஆலோசனை வழங்கவும் அமைச்சரவை அனுமதி வழங்கியுள்ளது.

நிதி, திட்டமிடல் மற்றும் பொருளாதார அபிவிருத்தி அமைச்சரான ஜனாதிபதி முன்வைத்த யோசனைக்கே இவ்வாறு அங்கீகாரம் வழங்கப்பட்டுள்ளது.