வடகிழக்கு தழுவிய பூரண ஹர்த்தாலுக்கு மட்டக்களப்பு மாவட்ட பொதுமக்களின் ஒத்துழைப்பை வேண்டி நிற்பதாக தமிழ் தேசிய கட்சிகள் கூட்டாகத் தெரிவித்துள்ளன.
இன்று (17.10.2023) மட்டக்களப்பு ஊடக அமையத்தில் இடம்பெற்ற ஊடக சந்திப்பின் போதே மேற்கண்டவாறு கேட்டுக்கொண்டுள்ளனர். இது குறித்து அச்சந்திப்பில் கலந்து கொண்ட மட்டக்களப்பு மாவட்ட முன்னாள் பாராளுமன்ற உறுப்பினர் ஞா.ஸ்ரீ நேசன் கருத்து தெரிவிக்கையில்,
முல்லைத்தீவு நீதிபதி சரவணராஜாவுக்கு இடம்பெற்ற உயிர் அச்சுறுத்தல் காரணமாக அவர் இந்த நாட்டை விட்டு வெளியேறவேண்டிய நிலை ஏற்பட்டுள்ளது, இது நீதித்துறை இந்த நாட்டில் சுதந்திரமாக செயற்பட முடியாத நிலைமையை புலப்படுத்துகிறது. இதற்கு கண்டனம் தெரிவிக்கும் முகமாக வடக்கு,கிழக்கு தமிழ் பேசுகின்ற மக்கள் அனைவரும் ஒன்று சேர்ந்து எதிர்வரும் 20 ஆம் திகதி வெள்ளிக்கிழமை பூரண ஹர்த்தாலை அனுஷ்டிக்க வேண்டும் என தெரிவித்தார்.
மேலும் இந்த ஊடக சந்திப்பில் கலந்து கொண்ட தமிழரசுக்கட்சி, தமிழ் ஈழ விடுதலை இயக்கம் ( ரெலோ) ,தமிழீழ மக்கள் விடுதலைக் கழகம் (புளொட்) ,ஈழமக்கள் புரட்சிகர விடுதலை முன்னணி ,ஜனநாயக போராளிகள் கட்சிகளின் சார்பில் வர்த்தக சங்கம், அரச ஊழியர்கள் ,பொதுமக்கள் , போக்குவரத்து சார்ந்த பணிகளில் ஈடுபடுகின்ற அனைவரினதும் ஆதரவினை வேண்டி நிற்கின்றோம் எனத் தெரிவித்துள்ளார்.
