கொழும்பில் உலக வங்கியானது முன்னேற்ற ஆற்றல் மாற்றம் தொடர்பான வட்டமேசை கலந்துரையாடலை ஏற்பாடு செய்யுமென மின்சக்தி மற்றும் எரிசக்தி அமைச்சர் காஞ்சன விஜேசேகரஅறிவித்துள்ளார்.
குறித்த தகவலை அவர் தனது எக்ஸ் தளத்தில் வெளியிட்ட பதிவொன்றில் குறிப்பிட்டுள்ளார்.
இது தொடர்பாக அந்த பதிவில் அவர் மேலும் தெரிவிக்கையில், “உலக வங்கியானது மே 29 ஆம் திகதி கொழும்பில் ஆற்றல் மாற்றத்தை மேம்படுத்துவதற்கான வட்டமேசை மாநாட்டை ஏற்பாடு செய்யவுள்ளது.
கடந்த வாரம் மின்சக்தி மற்றும் எரிசக்தி அமைச்சில் உலக வங்கி குழுவுடன் இந்த நிகழ்வின் ஆரம்ப கலந்துரையாடல் நடைபெற்றது.
புதுப்பிக்கத்தக்க எரிசக்தித் துறையில் முதலீடுகளை ஈர்ப்பது, ஆற்றல் மாற்றத்தை விரைவுபடுத்துதல், பசுமை ஹைட்ரஜன் திட்டங்கள் மற்றும் தனியார் முதலீடுகளை அதிகரிப்பதில் இந்தத் திட்டம் கவனம் செலுத்தும்.
மேம்பாட்டு முகமைகளைச் சேர்ந்த ஆற்றல் மற்றும் நிதி வல்லுநர்கள், தொழில்துறை பங்குதாரர்கள் மற்றும் துறை அமைச்சகங்களைச் சேர்ந்த அதிகாரிகள் இந்த நிகழ்வில் பங்கேற்பார்கள்” என அவர் குறிப்பிட்டுள்ளார்.
