தன்னை அரசியல் ரீதியாக அழிக்கும் செயற்பாடுகளை மாபியாக்கள் திட்டமிட்டு செயற்படுவதாகவும் தான் ஒருபோதும் அதற்கு அஞ்சப்போவதில்லையெனவும் இராஜாங்க அமைச்சர் சதாசிவம் வியாழேந்திரன் தெரிவித்தார்.
தனது செயலாளர் கைதுசெய்யப்பட்டமை திட்டமிட்ட செயற்பாடு எனவும் குறித்த சம்பவத்துடன் அவருக்கு எந்தவித தொடர்பும் இல்லையெனவும் அவர் தெரிவித்தார்.
இன்று (02) மட்டு.ஊடக அமையத்தில் நடைபெற்ற ஊடகவியலாளர் சந்திப்பின்போதே அவர் இதனை தெரிவித்தார்.
பொலநறுவையை சேர்ந்த தொழிலதிபர் ஒருவர் 69 இலட்சம் மண் அனுமதிப்பத்திரங்களை மட்டக்களப்பு மாவட்டத்திற்குள் பெற்றிருந்த நிலையில், அவை தன்னால் தடுத்து நிறுத்தப்பட்டதாகவும் அவற்றினை மீள வழங்குமாறு தனக்கு பல்வேறு அழுத்தங்கள் வழங்கப்பட்டபோதிலும் அதற்கு தான் உடன்படாத நிலையிலேயே தனது செயலாளரை இவ்வாறான நிலைக்கு கொண்டுசென்று தன்னை அச்சுறுத்த முனைவதாகவும் இராஜாங்க அமைச்சர் தெரிவித்தார்.
எவ்வாறான அச்சுறுத்தலுக்கும் தான் அடிபணியப்போவதில்லையெனவும் இராஜாங்க அமைச்சர் வியாழேந்திரன் தெரிவித்தார்.
