மட்டக்களப்பு மாவட்டத்தில் எதிர்வரும் பாராளுமன்ற தேர்தலில் போட்டியிடுவோர் வேட்பு மனுக்களை தாக்கல் செய்வதற்காக இன்று(10) மட்டக்களப்பு பழைய மாவட்ட செயலகத்தில் உள்ள தேர்தல் அலுவலகத்தில் வருகைதந்திருந்தனர்.
இந்த நிலையில் பலத்த பாதுகாப்புக்கு மத்தியில் குறித்த வேட்பு மனுத் தாக்கல் செய்யும் பணிகள் முன்னெடுக்கப்பட்டிருந்தன.
மாவட்ட செயலகத்தின் நுழைவாயில்கள் பூட்டப்பட்டு, கட்சிகள் மற்றும் சுயேட்சைக்குழுக்களின் குறிப்பிடத்தக்க உறுப்பினர்கள் மட்டுமே மாவட்ட செயலகத்திற்குள் நுழைவதற்கு அனுமதிக்கப்பட்டிருந்தனர்.
இந்தநிலையில் ஈபிடிபி கட்சியின் சார்பில் அக்கட்சியின் மட்டக்களப்பு மாவட்ட அமைப்பாளர் எஸ்.சிவானந்தராஜா தலைமையிலும, தேசிய மக்கள் சக்தியின் சார்பில் மட்டக்களப்பு மாவட்ட மத்தியகுழு உறுப்பினர் க.பிரபு தலைமையிலும், தேசிய ஜனநாயக முன்னணி கட்சியின் சார்பில் அக்கட்சியின் தலைமை வேட்பாளரான முன்னாள் பிரதியமைச்சர் விநாயகமூர்த்தி முரளிதரன் தலைமையிலும், தமிழ் மக்கள் விடுதலைப்புலிகள் கட்சியின் சார்பில் அக்கட்சியின் தலைவரும் முன்னாள் இராஜாங்க அமைச்சருமான சிவநேசதுரை சந்திரகாந்தன் தலைமையிலும், ஜனநாயக இடதுசாரி முன்னணியின் சார்பில் அக்கட்சியின் மட்டக்களப்பு மாவட்ட அமைப்பாளர் உமர்லேப்பை ஜபாத் தலைமையிலும் குறித்த வேட்பு மனுக்கள் தாக்கல் செய்யப்பட்டன.
இங்கு ஊடகங்களுக்கு கருத்து தெரிவித்த சிவநேசதுரை சந்திரகாந்தன் இம்முறை அம்பாறை மற்றும் திருகோணமலை மாவட்டங்களிலும் வேட்புமனுக்களை தாக்கல் செய்துள்ளதாகவும் தெரிவித்திருந்தார்.
அதேசமயம் சில சுயேட்சைக்குழுக்களும் வேட்பு மனுக்களை தாக்கல் செய்திருந்தமை குறிப்பிடத்தக்கது.
