இஸ்ரேலில் ஒக்டோபர் 27ஆம் திகதி நடைபெற்ற நாடாளுமன்றத் தேர்தலில் பிரதமர் பெஞ்சமின் நெதன்யாகுவின் கூட்டணி பெரும்பான்மையை இழந்துள்ள போதிலும், மாற்று அரசாங்கத்தை அமைப்பதில் எதிர்க்கட்சிகளிடையே இணக்கப்பாடு ஏற்படவில்லை.
120 உறுப்பினர்களைக் கொண்ட நாடாளுமன்றத்தில் நெதன்யாகுவின் ஆதரவுக் கட்சிகள் 53 ஆசனங்களையும், அவருக்கு எதிரான சியோனிச எதிர்க்கட்சிகள் 48 ஆசனங்களையும், அரபுக் கட்சிகள் 19 ஆசனங்களையும் பெற்றுள்ளன. ஆட்சியமைக்க 61 ஆசனங்கள் தேவைப்படுகின்றன.
எதிர்க்கட்சித் தலைவர் காடி ஐசன்கோட், அரபுக் கட்சிகளின் ஆதரவுடன் மாற்று அரசாங்கத்தை அமைப்பதற்கான முயற்சிகளில் ஈடுபட்டுள்ளார். எனினும், அரபுக் கட்சிகளுடன் இணைந்து செயற்படுவது தொடர்பில் எதிர்க்கட்சிகளிடையே கருத்து வேறுபாடுகள் காணப்படுகின்றன.
இதற்கிடையில், ஒக்டோபர் 7 தாக்குதல் தொடர்பில் விசாரணை ஆணைக்குழுவை அமைத்தல், அனைத்து குடிமக்களுக்கும் கட்டாய தேசிய அல்லது இராணுவ சேவையை அறிமுகப்படுத்துதல் மற்றும் நீதித்துறை மறுசீரமைப்புச் சட்டங்களை இரத்துச் செய்தல் உள்ளிட்ட நடவடிக்கைகளை முன்னெடுக்கவுள்ளதாக ஐசன்கோட் தெரிவித்துள்ளார்.
தேர்தல் முடிவுகள் தொடர்பில் நெதன்யாகு தரப்பினர் முறைகேடுகள் மற்றும் வெளிநாட்டுத் தலையீடுகள் குறித்த குற்றச்சாட்டுகளை முன்வைத்துள்ளனர்.
எதிர்வரும் நவம்பர் 4ஆம் திகதி உத்தியோகபூர்வ தேர்தல் முடிவுகள் ஜனாதிபதி ஐசக் ஹெர்சோகிடம் சமர்ப்பிக்கப்படவுள்ளதுடன், நவம்பர் 10ஆம் திகதி புதிய நாடாளுமன்றம் கூடவுள்ளது.
இதனால், இஸ்ரேலில் அடுத்த அரசாங்கத்தை யார் அமைப்பார்கள் என்ற கேள்வி தொடர்ந்து நீடிக்கிறது.
