வேயங்கொட வதுரவ பிரதேசத்தில் நிர்மாணிக்கப்பட்டு வரும் மத்திய அதிவேக நெடுஞ்சாலைக்கு அருகில் பூமிக்கு அடியில் புதையல் ஒன்றை தேடும் பணி நேற்று (21) ஆரம்பமானது.
அத்தனகல்ல நீதவான் நீதிமன்றத்தினால் வழங்கப்பட்ட நீதிமன்ற உத்தரவுக்கு அமைய இந்த நடவடிக்கைகள் இடம்பெற்று வருகின்றன.
இங்கு புதையல் இருப்பதாக கூறி பல ஆண்டுகளாக புதையல் திருடர்களால் அந்த இடத்தை தோண்டியுள்ளனர்.
மேலும், பல சந்தர்ப்பங்களில் புதையலைத் திறக்கப் பயன்படுத்திய உபகரணங்களுடன் பலரையும் பாதுகாப்புப் பிரிவினர் கைது செய்துள்ளனர்.
இவ்வாறு கைது செய்யப்பட்டவர்களில் பிக்கு ஒருவரும் அடங்குவதாக வேயங்கொடை பொலிஸார் தெரிவிக்கின்றனர்.
தொல்பொருள் திணைக்களம் மேற்கொண்ட விசாரணைகளின் போது இங்கு புதையல் எதுவும் இல்லை என தகவல் வெளியாகியுள்ளது.
ஆனால் பொலிஸ் விசேட அதிரடிப்படையினர் நடத்திய விசாரணையில் பூமிக்குள் ஏதோ ஒன்று இருப்பது தெரியவந்துள்ளது.
இதன்படி, அத்தனகல்ல நீதவான் நீதிமன்றில் உண்மைகளை அறிக்கை செய்ததன் பின்னர், தொல்பொருள் திணைக்களம், சுரங்க மற்றும் புவியியல் பணியகம், வேயங்கொடை பொலிஸ், வீதி அபிவிருத்தி அதிகாரசபை, மீரிகம பிரதேச செயலகம் மற்றும் பொதுமக்களின் பங்குபற்றுதலுடன் அதிகாரிகளின் மேற்பார்வையில் அகழ்வுப் பணிகள் மேற்கொள்ளப்படுகின்றன.
