பிரபல பாதாள உலகக்குழு தலைவர் எனக்கூறப்படும் கணேமுல்ல சஞ்ஜீவ மற்றும் அவரது பிரதான துப்பாக்கி தாரி கொத்த அசங்க ஆகியோர் இந்தியாவில், அந்நாட்டு பாதுகாப்பு பிரிவினரால் கைது செய்யப்பட்டுள்ளதாக தகவல்கள் பரவி வருவதாக புலனாய்வுப் பிரிவின் அதிகாரி ஒருவர் தெரிவித்துள்ளார்.
இலங்கையில் பாதாள உலகக் குழுக்களின் செயற்பாடுகளை ஒடுக்கும் நடவடிக்கையில் ஈடுபட்டுள்ள பொலிஸார் கடந்த 2018 ஆம் ஆண்டு இவர்களை கைது செய்ய தேடிச்சென்ற போது இவர்கள் இருவரும் மன்னாரில் இருந்து படகு மூலம் இந்தியாவுக்கு தப்பிச் சென்றுள்ளனர்.
இந்தியாவுக்கு தப்பிச் சென்ற இந்த சந்தேக நபர்கள் அங்கிருந்தவாறு இலங்கையில் தமது ஆட்களை பயன்படுத்தி போதைப் பொருள் வர்த்தகம், கப்பம் பெறுதல், கொலை சம்பவங்களை அரங்கேற்றி வந்துள்ளதாக பொலிஸாருக்கு தகவல் கிடைத்துள்ளது.
இந்த நிலையில் இந்திய பாதுகாப்பு பிரிவினர் எந்த காரணத்திற்காக இவர்களை கைது செய்துள்ளனர் என்ற சரியான தகவல்கள் கிடைக்கவில்லை என இலங்கை புலனாய்வுப் பிரிவின் தகவல்கள் தெரிவிக்கின்றன.
இவர்கள் கைது செய்யப்பட்டுள்ளமை குறித்து இந்திய பாதுகாப்பு பிரிவினர் இலங்கை பொலிஸாருக்கு இதுவரை அறிவிக்கவில்லை எனவும் பொலிஸ் தலைமையகத்தின் அதிகாரி ஒருவர் கூறியுள்ளார். மேலும் இவர்கள் இந்தியாவில் கைது செய்யப்பட்டுள்ளமை தொடர்பில் தகவல்கள் பரவி வருவதையும் அவர் உறுதிப்படுத்தியுள்ளார்.
