தன்னுடைய புகைப்படங்கள் மற்றும் பெயரை, தனது அனுமதியின்றி பயன்படுத்த தடை விதிக்க கோரி டெல்லி உயர்நீதிமன்றத்தில் நடிகை ஐஸ்வர்யா ராய் வழக்கு தொடர்ந்துள்ளார்.
நடிகை ஐஸ்வர்யா ராய், தனது பெயர் மற்றும் புகைப்படங்களை அனுமதியின்றி வணிக ரீதியாக பயன்படுத்துவதற்கு தடை விதிக்கக் கோரி, டெல்லி உயர்நீதிமன்றத்தில் வழக்கு தொடர்ந்தார். டி-ஷர்ட்கள், பாத்திரங்கள், ஜாடிகள் உள்ளிட்ட பொருட்களில் அவரது புகைப்படங்கள் அனுமதியின்றி பயன்படுத்தப்பட்டு வருவதாகவும், இது தனது தனிப்பட்ட உரிமைகளை மீறுவதாகவும் அவர் மனுவில் குறிப்பிட்டார்.
இந்த வழக்கு இன்று நீதிபதி பிரதிபா எம். சிங் முன்பு இந்த வழக்கு விசாரணைக்கு வந்தது. ஐஸ்வர்யா ராயின் தரப்பு வழக்கறிஞர், அவரது புகைப்படங்கள் மற்றும் பெயர் அனுமதியின்றி பயன்படுத்தப்படுவது, அவரது பிரபலத்தை தவறாகப் பயன்படுத்துவதாகவும், இது சட்டவிரோதமானது என்றும் வாதிட்டார். மேலும், இதுபோன்ற செயல்கள் நடிகையின் கண்ணியத்தையும், தனிப்பட்ட உரிமைகளையும் பாதிக்கின்றன என்று கூறப்பட்டது.
நீதிபதி, இந்த விவகாரத்தில் உரிய உத்தரவு பிறப்பிக்கப்படும் என்று உறுதியளித்தார். “எந்தவொரு தனிநபரின் பெயர் மற்றும் புகைப்படங்களை அவர்களின் அனுமதியின்றி வணிக ரீதியாக பயன்படுத்துவது ஏற்கத்தக்கதல்ல. இதற்கு தடை விதிக்க தேவையான நடவடிக்கைகள் எடுக்கப்படும்,” என்று நீதிபதி தெரிவித்தார். இந்த வழக்கு, பிரபலங்களின் உரிமைகள் மற்றும் அவர்களின் உருவப்படுத்தல் தொடர்பான சட்டரீதியான பாதுகாப்பு குறித்த விவாதங்களை மீண்டும் எழுப்பியுள்ளது.
விசாரணையின் அடுத்த கட்டத்திற்காக, நீதிமன்றம் இரு தரப்பு வாதங்களையும் மேலும் ஆய்வு செய்ய உள்ளது. இந்த வழக்கு, இந்தியாவில் பிரபலங்களின் தனிப்பட்ட உரிமைகளை பாதுகாக்கும் சட்டங்களை வலுப்படுத்துவதற்கு முக்கியமானதாக பார்க்கப்படுகிறது. ஐஸ்வர்யா ராயின் இந்த சட்ட நடவடிக்கை, அவரது பெயர் மற்றும் புகைப்படங்களை தவறாகப் பயன்படுத்துவதை தடுக்க முன்னுதாரணமாக அமையும் என்று எதிர்பார்க்கப்படுகிறது.
