உலகச் சந்தையில் எரிபொருள் விலையில் ஏற்படும் மாற்றங்களைக் கருத்திற்கொண்டு, டீசலுக்காக 100 ரூபாய் வரை மானியம் வழங்கத் தீர்மானித்துள்ளதாக ஜனாதிபதி அனுர குமார திசாநாயக்க தெரிவித்துள்ளார்.
இலங்கையின் டிஜிட்டல் பொருளாதாரத்தில் புதிய மைல் கல்லாகக் கருதப்படும் “தேசிய QR கொடுப்பனவுத் திட்டத்தை” (National QR Payment Project) உத்தியோகபூர்வமாக ஆரம்பித்து வைக்கும் நிகழ்வில் கலந்துகொண்டு உரையாற்றும் போதே அவர் இதனைத் தெரிவித்தார்.
தற்போதைய சூழலில் தேவையுள்ள குறிப்பிட்ட தரப்பினரை இலக்காகக் கொண்டு எரிபொருள் மானியம் வழங்குவதே பொருத்தமானது என ஜனாதிபதி குறிப்பிட்டார். இதன்படி, டீசலுக்கு 100 ரூபாய் வரை மானியம் வழங்கத் தீர்மானிக்கப்பட்டுள்ளது. எனினும், இந்த மானியத்தின் மூலம் அதிக பலன் பெறுவோர் யார் என்பதைக் கண்டறியத் தரவுகளைத் திரட்ட வேண்டியுள்ளதாகவும் அவர் கூறினார்.
நாணயத்தாள்கள் மற்றும் காசுகளின் பயன்பாட்டைக் குறைத்து, இலங்கையை ஒரு ‘மின்னணுப் பணப் பரிமாற்ற’ (Cash-lite) பொருளாதாரமாக மாற்றுவதே இந்தத் திட்டத்தின் நோக்கமாகும். 15 பில்லியன் டொலர் பெறுமதியான டிஜிட்டல் பொருளாதாரத்தைக் கட்டியெழுப்புவதே அரசாங்கத்தின் இலக்காகும்.
இன்று முதல் நடைமுறைக்கு வரும் வகையில், 5,000 ரூபாய் வரையிலான அனைத்து LankaQR பரிவர்த்தனைகளுக்காகவும் வர்த்தகர்களிடமிருந்து வசூலிக்கப்படும் சேவைக்கட்டணம் முழுமையாக நீக்கப்படுவதற்கு நிதி நிறுவனங்கள் நடவடிக்கை எடுத்துள்ளன.
இன்னும் ஒரு வாரத்தில் உலகச் சந்தையில் டீசல் விலை எவ்வளவு உயரும் என்று கணிக்க முடியாது எனவும், இத்தகைய சவால்களை எதிர்கொள்ளவே இத்திட்டங்கள் முன்னெடுக்கப்படுவதாகவும் ஜனாதிபதி மேலும் சுட்டிக்காட்டினார்.
