தமிழக வெற்றிக் கழகத் தலைவர் விஜய் தமிழ்நாட்டின் 13வது முதல்வராக நேற்று முன்தினம் (10.05.206) பதவியேற்று தன்னுடைய அலுவல் பணிகளை தொடர்ந்து வருகிறார். அதேசமயம், தமிழக அரசியல் களத்தில் உள்ள மூத்த தலைவர்களை முதல்வர் விஜய் நேரில் சந்தித்து வாழ்த்து பெற்று வருகிறார். அந்த வகையில் சென்னை ஆழ்வார்பேட்டையில் உள்ள முன்னாள் முதல்வரும் திமுக தலைவருமான மு.க.ஸ்டாலின் இல்லத்திற்கு முதல்வர் விஜய் நேற்று (11.05.2026) சென்றார்.
அப்போது எதிர்க்கட்சித் தலைவர் உதயநிதி ஸ்டாலின் வீட்டு வாசல் வரை வந்து முதல்வர் விஜய்யை ஆரத்தழுவி வரவேற்று வீட்டுக்குள் அழைத்துச் சென்றார். அதனை தொடர்ந்து மு.க.ஸ்டாலினை முதல்வர் விஜய் சந்தித்தார். அப்போது முதல்வர் விஜய்யை மு.க.ஸ்டாலின் ஆரத்தழுவி வரவேற்றார். அதனை தொடர்ந்து முதல்வர் விஜய்க்கு மு.க.ஸ்டாலின் பொன்னாடை போர்த்தினார். பதிலுக்கு முதல்வரும், மு.க.ஸ்டாலினுக்கு பொன்னாடை போர்த்தி இருவரும் பரஸ்பரம் வாழ்த்துக்களைத் தெரிவித்துக் கொண்டனர்.
அதன் பின்னர், முதல்வர் விஜய்யை இருக்கையில் அமர வைத்து அவருடன் மு.க. ஸ்டாலினும், உதயநிதி ஸ்டாலினும் சிறிது நேரம் பேசினர். இந்நிலையில் இது தொடர்பாக மு.க. ஸ்டாலின் எக்ஸ் சமூக வலைத்தளத்தில் வெளியிட்டுள்ள பதிவில், “தமிழ்நாடு முதலமைச்சராகப் பொறுப்பேற்றுள்ள விஜய் அரசியல் நாகரிகத்துடன் என்னைச் சந்தித்து வாழ்த்து பெற்றார். அவருக்கு என் அன்புநிறை வாழ்த்துகளையும், ஆலோசனைகளையும் வழங்கினேன்” எனக் குற்ப்பிட்டுள்ளார்.
