பாடசாலையை முடித்து துறவறம் பூணுவதற்காக விகாரைக்கு வந்த 14 வயது சிறுவனை, அவர் வந்த முதல் நாளிலேயே கடுமையான முறையில் துஷ்பிரயோகம் செய்த குற்றச்சாட்டில் குற்றவாளியாகக் காணப்பட்ட தேரர் ஒருவருக்கு, 30 ஆண்டுகள் கடுங்காவல் சிறைத்தண்டனை விதித்து அனுராதபுரம் சிறுவர் குற்றங்கள் தொடர்பான விசேட மேல் நீதிமன்ற நீதிபதி சந்துன் விதான இன்று (27) தீர்ப்பளித்துள்ளார்.
இவ்வாறு கடுமையான சிறைத்தண்டனை விதிக்கப்பட்டவர் தம்புத்தேகம, ஹுரிகஸ்வெவ, தலாகொல வெவ விகாரையின் விகாராதிபதி முல்லேரியாவே விமலதிஸ்ஸ என்ற 65 வயதுடைய தேரர் ஆவார்.
பாதிக்கப்பட்ட மைனர் சிறுவனுக்கு 5 இலட்சம் ரூபாய் பணத்தை இழப்பீடாக வழங்குமாறு மேல் நீதிமன்ற நீதிபதி பிரதிவாதியான தேரருக்கு உத்தரவிட்டார்.
இந்த இழப்பீட்டுத் தொகையை செலுத்தத் தவறினால், பிரதிவாதியான தேரருக்கு மேலும் 6 மாத சிறைத்தண்டனை விதிக்கப்படும் எனவும் தீர்ப்பளிக்கப்பட்டது.
குற்றச்சாட்டுகள்: பிரதிவாதியான விகாராதிபதிக்கு எதிராக மேல் நீதிமன்றத்தில் 3 குற்றச்சாட்டுகள் சுமத்தப்பட்டிருந்த நிலையில், அந்த 3 குற்றச்சாட்டுகளுக்கும் அவர் குற்றவாளி என நீதிமன்றம் தீர்ப்பளித்துள்ளது.
சிறைத்தண்டனைக்கு மேலதிகமாக, பிரதிவாதியான தேரருக்கு முதலாவது குற்றச்சாட்டுக்காக 5,000 ரூபாயும், இரண்டாவது மற்றும் மூன்றாவது குற்றச்சாட்டுகளுக்கு தலா 15,000 ரூபாயும் அபராதம் விதித்து விசேட மேல் நீதிமன்ற நீதிபதி சந்துன் விதான உத்தரவிட்டார்.
இந்த அபராதத் தொகையை செலுத்தத் தவறினால், 3 குற்றச்சாட்டுகளுக்கும் தனித்தனியாக மேலும் தலா 4 மாதங்கள் சிறைத்தண்டனை அனுபவிக்க நேரிடும் எனவும் நீதிபதி உத்தரவிட்டுள்ளார்.
