நாட்டில் எச்.ஐ.வி (HIV) வைரஸால் பாதிக்கப்பட்டோரின் எண்ணிக்கை ஆண்டுதோறும் அதிகரித்து வருவதாக பாலியல் நோய்கள் தொடர்பான சமூக நிபுணர் வைத்தியர் சத்யா ஹெரத் தெரிவித்துள்ளார்.
சுகாதார அமைச்சகத்தில் இன்று (13) நடைபெற்ற ஊடக சந்திப்பில் கருத்து தெரிவித்த அவர், குறிப்பாக கொழும்பு மற்றும் கம்பஹா மாவட்டங்களில் இருந்து அதிகளவிலான எச்.ஐ.வி தொற்றாளர்கள் பதிவாகி வருவதாக கூறினார்.
2023 ஆம் ஆண்டு முதல் எச்.ஐ.வி தொற்றாளர்களின் எண்ணிக்கை தொடர்ச்சியாக உயர்ந்து வருவதுடன், குறிப்பாக ஆண்களிடையே இந்தத் தொற்று அதிகரித்துள்ளதாகவும் அவர் சுட்டிக்காட்டினார்.
பாதுகாப்பற்ற பாலியல் உறவுகள் எச்.ஐ.வி பரவுவதற்கான முக்கிய காரணமாக இருப்பதுடன், போதைப்பொருள் பயன்படுத்தும் போது ஊசிகள், சிரிஞ்சுகள் மற்றும் பிற உபகரணங்களைப் பகிர்ந்து பயன்படுத்துவதாலும் தொற்று பரவக்கூடும் என அவர் எச்சரித்தார்.
எச்.ஐ.வி தொற்றுக்கு முழுமையான குணப்படுத்தும் சிகிச்சை தற்போது இல்லை என்பதையும், தொற்றுக்குள்ளானவர்கள் வாழ்நாள் முழுவதும் தொடர்ச்சியான மருத்துவ கண்காணிப்பும் மருந்து சிகிச்சையும் பெற வேண்டியது அவசியம் என்றும் அவர் வலியுறுத்தினார்.
மேலும், எச்.ஐ.வி, பாலியல் ரீதியாக பரவும் நோய்த்தொற்றுகள் (STI) மற்றும் ஹெபடைடிஸ் போன்ற நோய்களை ஆரம்பத்திலேயே கண்டறிந்து அவற்றின் பரவலைக் கட்டுப்படுத்தும் நோக்கில், கொழும்பு மற்றும் கம்பஹா மாவட்டங்களை மையமாகக் கொண்டு சிறப்பு நடமாடும் மருத்துவமனைத் திட்டம் நடைமுறைப்படுத்தப்பட்டுள்ளதாகவும் வைத்தியர் சத்யா ஹெரத் தெரிவித்தார்.
