ஆப்பிரிக்கக் கண்டத்தின் நிலப்பரப்பை அதன் உண்மையான அளவிற்கு நெருக்கமாக பிரதிபலிக்கும் வரைபடப் பயன்பாட்டை ஊக்குவிக்கும் தீர்மானத்தை ஐக்கிய நாடுகள் பொதுச் சபை நிறைவேற்றியுள்ளது.
டோகோ தலைமையில் முன்வைக்கப்பட்ட இந்தத் தீர்மானத்திற்கு 164 நாடுகள் ஆதரவாக வாக்களித்துள்ளதுடன், அமெரிக்கா மாத்திரம் எதிராக வாக்களித்துள்ளது. மேலும், 6 நாடுகள் வாக்களிப்பில் கலந்துகொள்ளவில்லை.
தீர்மானம், உலக வரைபடங்களில் கண்டங்களின் பரப்பளவை மிகவும் துல்லியமாக பிரதிபலிக்கும் வகையில் ‘Equal Earth’ போன்ற சமபரப்பளவு வரைபட வீழ்ப்புகளைப் பயன்படுத்துவதை ஊக்குவிக்கிறது.
பல நூற்றாண்டுகளாக பரவலாகப் பயன்படுத்தப்பட்டு வரும் 1569ஆம் ஆண்டு ஜெரார்டஸ் மெர்கேட்டரால் உருவாக்கப்பட்ட ‘Mercator’ வரைபட வீழ்ப்பு, துருவப் பகுதிகளுக்கு அருகிலுள்ள நிலப்பரப்புகளை அவற்றின் உண்மையான அளவை விட பெரிதாகக் காட்டுகிறது.
இதன் காரணமாக ஆப்பிரிக்கா போன்ற பூமத்திய ரேகைக்கு அருகிலுள்ள கண்டங்கள் ஒப்பீட்டளவில் சிறியதாகத் தோன்றுகின்றன. உதாரணமாக, மெர்கேட்டர் வரைபடத்தில் கிரீன்லாந்தும் ஆப்பிரிக்காவும் கிட்டத்தட்ட ஒரே அளவில் தோன்றினாலும், உண்மையில் ஆப்பிரிக்கா கிரீன்லாந்தை விட சுமார் 14 மடங்கு பெரியது.
இந்தப் பிரச்சினைக்கு மாற்றாக, 2018ஆம் ஆண்டு உருவாக்கப்பட்ட ‘Equal Earth’ வரைபட வீழ்ப்பு கண்டங்களின் பரப்பளவு விகிதங்களை மிகவும் துல்லியமாகப் பிரதிபலிக்கும் வகையில் வடிவமைக்கப்பட்டது.
இதேவேளை, ஆப்பிரிக்க ஒன்றியமும் கடந்த பெப்ரவரி மாதம் ‘Equal Earth’ வரைபட வீழ்ப்பை ஆப்பிரிக்காவின் புவியியல் அளவைச் சரியாக பிரதிபலிக்கும் வகையில் பயன்படுத்துவதற்கு ஆதரவு தெரிவித்திருந்தது.
ஐ.நா. பொதுச் சபையின் இந்தத் தீர்மானம் சட்டப்பூர்வமாக கட்டாயப்படுத்தும் தன்மையைக் கொண்டதல்ல. எனவே, நாடுகள் அல்லது நிறுவனங்கள் மெர்கேட்டர் வரைபடத்தை கட்டாயமாக கைவிட வேண்டும் என்ற நிலை ஏற்படவில்லை. மாறாக, கல்வி, ஊடகம், நிறுவனங்கள் மற்றும் டிஜிட்டல் தளங்களில் கண்டங்களின் உண்மையான பரப்பளவைச் சிறப்பாக பிரதிபலிக்கும் வரைபடங்களைப் பயன்படுத்துவதை ஊக்குவிக்கிறது.
இந்தத் தீர்மானம் உலக வரைபடங்களில் நீண்டகாலமாக நிலவி வந்த புவியியல் அளவீட்டு சிதைவுகள் தொடர்பான விவாதத்திற்கு புதிய முக்கியத்துவத்தை ஏற்படுத்தியுள்ளது.
