பிக்குகள் சிறைச்சாலைகளில் தடுத்து வைக்கப்படும் முறை மற்றும் சிறைச்சாலைகளில் இருந்து நீதிமன்றம் உள்ளிட்ட இடங்களுக்கு அழைத்துச் செல்லப்படும் நடைமுறைகள் தொடர்பான சட்டங்கள் மற்றும் விதிமுறைகளை மறுபரிசீலனை செய்ய விசேட குழுவொன்றை நியமிக்க ஜனாதிபதி அநுர குமார திசாநாயக்க தீர்மானித்துள்ளார்.
மகா சங்கத்தினருடன் நேற்று (8) ஜனாதிபதி அலுவலகத்தில் நடைபெற்ற விசேட கலந்துரையாடலின்போதே ஜனாதிபதி இதனைத் தெரிவித்தார்.
சட்டமா அதிபர், நீதி அமைச்சு, பொது நிர்வாக அமைச்சு, பௌத்த அலுவல்கள் அமைச்சு மற்றும் சிறைச்சாலை அதிகாரிகளை உள்ளடக்கியதாக இக்குழு அமைக்கப்படவுள்ளது. தற்போதைய நடைமுறைகளை இரண்டு வாரங்களுக்குள் ஆராய்ந்து, தேவையான சட்டத் திருத்தங்களை முன்வைக்குமாறு குழுவுக்கு அறிவுறுத்தப்பட்டுள்ளது.
குறிப்பாக, பிக்குகளை சிறைச்சாலைகளில் இருந்து நீதிமன்றம் உள்ளிட்ட இடங்களுக்கு அழைத்துச் செல்லும்போது காவி உடை அணிய அனுமதிக்கப்படாதமை தொடர்பில் மகா சங்கத்தினர் முன்வைத்த கவலைகளும் இதன்போது கவனத்தில் கொள்ளப்பட்டன.
பிக்குகளை இலக்காகக் கொள்ளாமல், அனைவருக்கும் பொதுவாகப் பொருந்தக்கூடிய வகையில் புதிய விதிமுறைகள் உருவாக்கப்பட வேண்டும் என ஜனாதிபதி வலியுறுத்தினார்.
கலகொடஅத்தே ஞானசார தேரர் காவி உடையின்றி நீதிமன்றத்தில் முன்னிலைப்படுத்தப்பட்ட சம்பவத்தைத் தொடர்ந்து ஏற்பட்ட சர்ச்சைகள் தொடர்பிலும் சந்திப்பில் கலந்துரையாடப்பட்டது.
