இலங்கை அரசுக்குச் சொந்தமான லங்கா சதொச நிறுவனத்தின் திரட்டப்பட்ட நஷ்டம், 2025 டிசம்பர் நிலவரப்படி 22 பில்லியன் ரூபாயாக (2,200 கோடி ரூபாய்) அதிகரித்துள்ளதாக வர்த்தக மற்றும் உணவுப் பாதுகாப்பு அமைச்சர் வசந்த சமரசிங்க தெரிவித்துள்ளார்.
நாடாளுமன்றத்தில் எதிர்க்கட்சி நாடாளுமன்ற உறுப்பினர் ரவி கருணாநாயக்க எழுப்பிய கேள்விக்குப் பதிலளித்த அமைச்சர், சதொச நிறுவனம் தனது பொருள் விநியோகஸ்தர்களுக்கு 14 பில்லியன் ரூபாய் கடன்பட்டுள்ளதாகவும், நிறுவனத்திடம் 5.8 பில்லியன் ரூபாய் பெறுமதியான பொருட்கள் மட்டுமே இருப்பில் உள்ளதாகவும் குறிப்பிட்டார்.
நஷ்டத்தைக் கட்டுப்படுத்தும் நோக்கில், சதொச கிளைகளின் எண்ணிக்கை 452 இலிருந்து 423 ஆகக் குறைக்கப்பட்டுள்ளதுடன், நஷ்டத்தில் இயங்கிய 29 கிளைகள் மூடப்பட்டுள்ளன.
மேலும், கொள்முதல் முறைகேடுகள் தொடர்பாக எட்டுக்கும் மேற்பட்ட விநியோகஸ்தர்கள் கடந்த மூன்று மாதங்களில் கறுப்புப் பட்டியலில் சேர்க்கப்பட்டுள்ளனர்.
இந்நிலையில், 2026ஆம் ஆண்டில் புதிதாக 25 கிளைகளைத் திறக்கவும், 100 பழைய கிளைகளை நவீனமயப்படுத்தவும் அரசாங்கம் திட்டமிட்டுள்ளதாகத் தெரிவிக்கப்பட்டுள்ளது.
