யாழ்ப்பாணத்தில் நடைபெற்ற முன்பள்ளி விளையாட்டு விழாவின் வினோத உடைப் போட்டியில், செம்மணி புதைகுழி விவகாரத்தைச் சித்தரிக்கும் வகையில் வேடமணிந்து பங்கேற்ற சிறுவனின் பெற்றோர் பொலிஸாரால் விசாரணைக்கு அழைக்கப்பட்டுள்ளதாகத் தகவல்கள் வெளியாகியுள்ளன.
குறித்த சிறுவனின் பெற்றோரை மருதங்கேணிப் பொலிஸார் இன்று (13) விசாரணைக்காக அழைத்துள்ளதாகத் தெரிவிக்கப்படுகிறது.
யாழ்ப்பாணம், வடமராட்சி கிழக்கு, செம்பியன்பற்று வடக்கில் அமைந்துள்ள சென் பிலிப் நேரிஸ் முன்பள்ளியின் வருடாந்த விளையாட்டு விழா நேற்று (12) புனித பிலிப்பு நேரியார் ஆலய முன்றலில் நடைபெற்றது.
இதன்போது இடம்பெற்ற வினோத உடைப் போட்டியில் பங்கேற்ற சிறுவன் ஒருவர், செம்மணி புதைகுழியில் புதைக்கப்பட்ட சிறுவர்களின் துயரத்தை வெளிப்படுத்தும் வகையில் வேடமணிந்து கவனத்தை ஈர்த்திருந்தார்.
தனது உடையில், காரணமின்றிப் புதைக்கப்பட்டதாகவும் தனக்கும் ஏனையோருக்கும் நீதி கிடைக்குமா என்றும் கேள்வி எழுப்பும் வாசகத்தை அவர் ஏந்தியிருந்தார்.
நிகழ்வின்போது விருந்தினர்கள் எழுப்பிய கேள்விகளுக்குப் பதிலளித்த சிறுவன், செம்மணி புதைகுழியில் புதைக்கப்பட்டவர்களுக்கு நீதி கோரும் வகையில் தனது கருத்துகளை வெளிப்படுத்தியிருந்தார்.
சிறுவனின் உருக்கமான பதில்கள் நிகழ்வில் கலந்துகொண்ட பார்வையாளர்கள் மற்றும் விருந்தினர்களின் கவனத்தை ஈர்த்ததாகத் தெரிவிக்கப்படுகிறது.
இந்நிலையில், செம்மணி புதைகுழி விவகாரத்தை மையப்படுத்தி சிறுவன் வேடமணிந்து பங்கேற்ற சம்பவம் தொடர்பில் அவரது பெற்றோர் பொலிஸ் விசாரணைக்கு அழைக்கப்பட்டுள்ளதாக வெளியாகியுள்ள தகவல் தற்போது கவனத்தைப் பெற்றுள்ளது.
