பொதுபல சேனா அமைப்பின் பொதுச் செயலாளர் கலகொடஅத்தே ஞானசார தேரர், சிறையில் கடுமையான மன உளைச்சலுக்கு உள்ளாகி விஷம் அருந்தி உயிரை மாய்த்துக்கொள்ளப் போவதாகக் கூறியதாக தித்தகல்ல ஆனந்தசிரி தேரர் தெரிவித்துள்ளார்.
ஞானசார தேரருக்கு ஜனாதிபதி மன்னிப்பு பெற்றுக்கொடுக்கும் முயற்சிகள் தொடர்பான நேர்காணலின்போதே அவர் இந்தத் தகவலை வெளியிட்டுள்ளார்.
ஞானசார தேரரிடம் விஷப் போத்தல் ஒன்று இருந்ததாகவும், அதனை அருந்தி உயிரிழக்கப்போவதாக அவர் கூறியபோது தலையிட்டு அந்த முடிவைக் கைவிடுமாறு சமாதானப்படுத்தியதாகவும் ஆனந்தசிரி தேரர் குறிப்பிட்டுள்ளார்.
பொதுபல சேனா அமைப்பின் காலத்திலிருந்தே ஞானசார தேரருடன் கருத்து முரண்பாடுகள் இருந்தபோதிலும், அவரது தற்போதைய சூழ்நிலையைக் கருத்தில் கொண்டு அவருக்கு ஆதரவளிக்கத் தீர்மானித்ததாகவும் அவர் தெரிவித்துள்ளார்.
ஞானசார தேரருக்கு ஜனாதிபதி அனுர குமார திஸாநாயக்க மன்னிப்பு வழங்க வேண்டும் எனக் கோரி முன்னெடுக்கப்படும் கையெழுத்துப் பிரசாரத்தில் இதுவரை 2 இலட்சத்து 25 ஆயிரத்துக்கும் அதிகமான கையெழுத்துக்கள் சேகரிக்கப்பட்டுள்ளதாகவும் ஆனந்தசிரி தேரர் கூறியுள்ளார்.
இந்தப் பிரசாரத்தைக் கைவிடுமாறு தமக்கு அச்சுறுத்தல்களும் நிதி உதவி தொடர்பான சலுகைகளும் முன்வைக்கப்பட்டதாகக் குற்றஞ்சாட்டிய அவர், உரிய அதிகாரிகளிடம் மனு சமர்ப்பிக்கப்படும் வரை நடவடிக்கையைத் தொடரப்போவதாகவும் தெரிவித்துள்ளார்.
