அம்பாறை மற்றும் உகன பொலிஸ் பிரிவுகளில் இரு பெண்களிடம் தங்கச் சங்கிலிகளைத் திருடிய சம்பவங்கள் தொடர்பில், முக்கிய சந்தேகநபர் உட்பட நான்கு பேரை அம்பாறை பிராந்திய ஊழல் தடுப்புப் பிரிவு பொலிஸார் கைது செய்துள்ளனர்.
கடந்த ஜூலை மாதம் கொண்டுவட்டுவான் குளத்திற்கு அருகிலும், ஓகஸ்ட் 11ஆம் திகதி உகன பகுதியிலும் இரு பெண்களின் தங்கச் சங்கிலிகள் திருடப்பட்டிருந்தன.
விசாரணைகளில், முக்கிய சந்தேகநபர் கொழும்பு, கடுவெல பகுதியில் பேருந்து சாரதியாகப் பணியாற்றி வந்தமை தெரியவந்துள்ளது. இரகசியத் தகவலின் அடிப்படையில், கடந்த திங்கட்கிழமை (12) அம்பாறை பகுதியில் வைத்து அவர் கைது செய்யப்பட்டார்.
அவரிடம் மேற்கொள்ளப்பட்ட விசாரணைகளைத் தொடர்ந்து, திருடப்பட்ட நகைகளை விற்பனை செய்ய உதவிய அம்பாறை தங்கக் கடை ஊழியர் ஒருவரும் கைது செய்யப்பட்டார். தொடர்ந்து கல்முனைத் தங்கக் கடையொன்றில் மேற்கொள்ளப்பட்ட சோதனையில், உருக்கப்பட்ட நிலையில் இருந்த இரண்டு தங்கச் சங்கிலிகளும் மீட்கப்பட்டதுடன், அக்கடையில் பணியாற்றிய இருவரும் கைது செய்யப்பட்டனர்.
மீட்கப்பட்ட தங்க நகைகளின் பெறுமதி ஏழு இலட்சம் ரூபாய்க்கும் அதிகம் எனப் பொலிஸார் தெரிவித்துள்ளனர். கைது செய்யப்பட்ட நால்வரையும் அம்பாறை நீதவான் நீதிமன்றத்தில் ஆஜர்படுத்துவதற்கான நடவடிக்கைகள் முன்னெடுக்கப்பட்டு வருகின்றன.
