சவுதி அரேபியாவில் மரண தண்டனை விதிக்கப்பட்டிருந்த இலங்கைப் பொறியாளர் சிவராசா அனோஜனின் மரண தண்டனை தளர்த்தப்பட்டுள்ளதாகத் தகவல் கிடைத்துள்ள போதிலும், எதிர்வரும் ஒக்டோபர் 17ஆம் திகதி நடைபெறவுள்ள வழக்கு விசாரணையின் பின்னரே தமது குடும்பத்தினருக்கு முழுமையான நிம்மதி கிடைக்கும் என அவரது சகோதரர் தெரிவித்துள்ளார்.
கல்முனை – நற்பிட்டிமுனையைச் சேர்ந்த சிவராசா அனோஜன், சமூக வலைத்தளப் பதிவொன்று தொடர்பான குற்றச்சாட்டில் சவுதி அரேபியாவில் கைது செய்யப்பட்டு, மரண தண்டனையை எதிர்நோக்கியிருந்தார்.
இந்நிலையில், அனோஜனுக்கு விதிக்கப்பட்ட மரண தண்டனை தளர்த்தப்பட்டுள்ளதாகப் பிரதி வெளிநாட்டு அலுவல்கள் அமைச்சர் அருண் ஹேமச்சந்திர தொலைபேசி ஊடாகத் தமது குடும்பத்தினருக்கு அறிவித்துள்ளதாக அவரது சகோதரர் தெரிவித்துள்ளார்.
