2026ஆம் ஆண்டுக்கான வரவு செலவுத் திட்டத்தின் கீழ் கொட்டகலை பிரதேச சபை உறுப்பினர்களுக்கு தலா இரண்டு இலட்சம் ரூபாய் வீதம் ஒதுக்கப்பட்ட நிதியை எதிர்வரும் நவம்பர் 15ஆம் திகதிக்கு முன்னர் அபிவிருத்திப் பணிகளுக்குச் செலவிட்டு அறிக்கை சமர்ப்பிக்க வேண்டும் என சபையின் தலைவர் ராஜமணி பிரசாந்த் தெரிவித்துள்ளார்.
நேற்று (13) நடைபெற்ற மாதாந்த அமர்வில் உரையாற்றிய அவர், குறித்த காலத்துக்குள் நிதியைப் பயன்படுத்தத் தவறினால் ஒதுக்கப்பட்ட நிதி திரும்பப் பெறப்படும் அபாயம் உள்ளதாகவும் குறிப்பிட்டார்.
மேலும், 2027ஆம் ஆண்டுக்கான வரவு செலவுத் திட்டத்தில் ஒவ்வொரு உறுப்பினருக்கும் தலா நான்கு இலட்சம் ரூபாய் ஒதுக்கத் தீர்மானிக்கப்பட்டுள்ளதாகவும், தீபாவளியை முன்னிட்டு கொமர்ஷல் “வாவி” பகுதியில் தற்காலிகக் கடைகளை அமைத்து வாடகைக்கு விடுவதன் மூலம் சபைக்கு மேலதிக வருமானம் கிடைக்கும் எனவும் தெரிவித்தார்.
இதற்கிடையில், கொட்டகலை மற்றும் லிந்துலை மாவட்ட வைத்தியசாலைகளில் நோயாளர்கள் முறையாகக் கவனிக்கப்படுவதில்லை என்றும், ஊழியர்கள் தரக்குறைவான வார்த்தைகளைப் பயன்படுத்துவதாகவும் உறுப்பினர்கள் முறைப்பாடு தெரிவித்துள்ளனர். இவ்விடயம் தொடர்பில் மத்திய மாகாண ஆளுநரின் கவனத்துக்கு எழுத்துமூலம் கொண்டு சென்று நடவடிக்கை எடுக்கப்படும் எனத் தலைவர் கூறினார்.
அத்துடன், மலையக மக்களை “கள்ளத்தோணி” எனக் குறிப்பிட்ட தோட்ட அதிகாரிக்கு எதிராக நடவடிக்கை எடுக்க வேண்டும் என உறுப்பினர்கள் வலியுறுத்தியுள்ளதாகவும் தெரிவித்த அவர், பிரதேச சபைக்கு 102 மில்லியன் ரூபாய் நிதி ஒதுக்கிய அரசாங்கத்துக்கு நன்றியும் தெரிவித்தார்.
