அனோஜனுக்காக சவூதி மன்னரிடம் பொதுமன்னிப்புக் கோரும் ஜனாதிபதி அநுரகுமார திஸாநாயக்க, ஞானசார தேரருக்கு பொதுமன்னிப்பு வழங்க மறுப்பது ஏன் என பிவிதுறு ஹெல உறுமய கட்சியின் தலைவரும் முன்னாள் அமைச்சருமான உதய கம்மன்பில கேள்வியெழுப்பியுள்ளார்.
ஞானசார தேரருக்கு பொதுமன்னிப்பு வழங்கி அரசாங்கம் தனது தவறுகளைத் திருத்திக்கொள்ள வேண்டும். இல்லையெனில் பல விளைவுகளை எதிர்கொள்ள நேரிடும் என்றும் அவர் எச்சரித்துள்ளார்.
கட்சியின் காரியாலயத்தில் இன்று (17) சனிக்கிழமை நடைபெற்ற ஊடகவியலாளர் சந்திப்பில் கருத்துத் தெரிவிக்கும்போதே அவர் இதனைக் குறிப்பிட்டார்.
நாட்டுக்காகக் குரல் கொடுத்த ஞானசார தேரர் அரசியல் நோக்கத்திற்காகப் பழிவாங்கப்பட்டுள்ளதாகக் குறிப்பிட்ட அவர், தேரருக்கு பொதுமன்னிப்பு வழங்குவதற்கான அதிகாரம் ஜனாதிபதிக்கே உள்ளதாகவும் தெரிவித்தார்.
மேலும், ஜனாதிபதி செயலகத்திற்கு முன்பாகப் போராட்டத்தில் ஈடுபடுபவர்கள் மீது பொலிஸார் அடக்குமுறையைப் பிரயோகிப்பதாகக் குற்றஞ்சாட்டிய கம்மன்பில, போராட்டங்கள் மூலம் ஆட்சிக்கு வந்ததை ஜனாதிபதி மறந்துவிடக் கூடாது என்றும் கூறினார்.
